KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

NOTISIA

Dia Internashonal di Trahadó Sosial: “Un futuro kompartí pa kambio transformashonal”

Dia Internashonal di Trahadó Sosial: “Un futuro kompartí pa kambio transformashonal”

Willemstad – Riba 19 di mart 2024, Dia Internashonal di Trahadó Sosial, trahadónan sosial di Kòrsou tambe ta selebrá e profeshon bunita aki. Anualmente, den e di tres siman di mart ku e aña aki a kai riba 19 di mart, mundu ta para ketu, rekonosé i gradisí e trabou inpagabel ku ta keda ehersé dor di nos trahadónan sosial.

E meta di e fecha aki ta entre otro pa e trahadó sosial por reflehá riba su logronan i desaroyo komo profeshonal. E aña aki e tema ta ‘Buen vivir – shared future for transformative change”. Ku e tema aki kier motivá e trahadó sosial pa adoptá inovashon, liderá ku aserkamentunan moderno ku tin basenan fundamental i konekshon ku konbibensia i harmonia.

Aki na Kòrsou, trahadónan sosial di diferente organisashon a uni pa pensa kon pa selebrá e dia aki den un esfera grandi. Anualmente tin un kongreso internashonal “The Joint Conference on Social Work, Education and Social Development” kaminda trahadónan sosial di diferente parti di mundu ta asistí. E aña aki, Kòrsou lo ta presente ku un delegashon di 17 trahadó sosial ku sea via di nan trabou òf riba nan mes inisiativa a logra pa por representá nos pais na Panama den luna di aprel próksimo. Pa 2024, e tema di e kongreso ta “respetá diversifikashon pa medio di akshonnan sosial kompartí” (e asina yamá ‘joint social actions’). Ku partisipashon na e kongreso, e delegashon di Kòrsou tin e oportunidat pa sera lasonan i interkambiá ku organisashonnan i profeshonalnan internashonal. Nos ta konvensí ku atkerí konosementu i tambe interkambionan ku profeshonalnan di otro partinan di mundu por ta alimento i un base fuerte pa por sigui ehersé e trabou ku amor i dedikashon. E delegashon ku ta biaha pa Panama na komienso di aprel, ta konvensí ku esaki ta komienso di un era di rekonosementu, union i hermandat den e profeshon aki na Kòrsou.

E profeshonalnan ku lo ta den e biahe aki ta Judeska Carlo di Bureau Brein in Balans; Rosa Perez i Shermine Isebia di SIGE; Turley Bitorina di Tzkz-Multiservices; Ana Maria Pauletta Parlamentario di Kòrsou; Lowella Koenraad di Malva Wellness Curaçao; Kimberly Ascencion; Cheryl Arrundel; Sliolaine Bernadina; Arthur Nivillac di Optima BV; Fayola Susanna, Sijolands Andrea, Arelies Knight, Judienne Koolman, Shaimilen Nita i Christopher de Wind komo respresentantenan di ministerio di SOAW i e último komo lider di delegashon. E biahe aki lo ta di 3 pa 9 di aprel 2024.

Nos kier felisitá tur trahadó sosial pa ku e luna di trahadó sosial i kier pidi tur pa sigui nos página di Facebook ‘Curacao Social Workers’ kaminda nos lo duna mas informashon di e biahe i tambe aktividatnan relashoná ku nos profeshon.

 

 

639114718427035"
639114718427035"