Women’s Steering Committee Curaçao ta uni na yamada mundial pa mas inklushon di personanan ku Down Syndrome

 

Women’s Steering Committee Curaçao ta uni na yamada mundial pa mas inklushon di personanan ku Down Syndrome

WILLEMSTAD – Den kuadro di Dia Mundial di Down Syndrome, direktiva di Women’s Steering Committee Curaçao (WSCC), ta uni na e yamada di Nashonnan Uní pa mas inklushon di personanan ku Down Syndrome. “Inklushon ta un aspekto pa kua Nashonnan Uní a bin ta hasi un yamada fuerte último añanan,” sra. Mirieta Lourens – de Lanoy, presidente di WSCC a bisa. “Si resien, relashoná ku Dia Internashonal di Hende Muhé, ‘United Nations’ (UN) a hasi un yamada pa mas inklushon di é hende muhé, ku selebrashon di World Down Syndrome Day, e yamada di UN ta pa organisashonnan, gubernamental, i tambe no -gubernamental,  tuma akshonnan ku mester tin komo meta pa stimulá mas inklushon di personanan ku Down Syndrome den nan komunidat. Pa logra esaki nos kada un mester buska pa ta mas mihó informá posibel relashoná ku Down Syndrome. Nos mester krea plataformanan den kua ta skucha personanan ku Down Syndrome i nan famia. Mas mihó informá kada un di nos ta, mas konsiente nos ta, i mas efisiente nos por traha kontra retonan manera, entre otro, mal interpretashon,” e presidente di WSCC a sigui bisa.

“Women’s Steering Committee Curaçao ta hasi un yamada riba organisashonnan, pa tene seshonnan informativo ku nan miembronan, skucha organisashon ku ta traha spesífikamente ku e grupo di enfoke menshoná, i hasi tur loke ta na alkanse pa stimulá mas konsientisashon i aseptashon relashoná ku Down Syndrome. Kòrda ku huntu nos por krea un bos fuerte ku ta sali na interes i bienestar di e grupo spesial aki. Ban hasi e dia di 21 di Mart, unu di rekuerdonan grato pa personanan ku Down Syndrome i sigui ku e focus pa hinter aña nan sinti ku realmente tin atenshon i aseptashon pa nan,” sra. Lourens a klousurá bisando.