Pa selebrá dia internashonal di teater: Ultimo funshon di RUMANNAN PURUNCHI
Willemstad 24 maart 2024
Dia 27 di mart ta dia internashonal di teater i Teatro KadaKen ta selebrá esaki ku e obra Rumannan Purunchi, skibí i dirigí pa Miluska Birge.
Dekretá na 1961, for di 1962 ta selebrá dia internashonal di teater. E meta di e dia ta pa selebrá e mentenan kreativo den teater i tira lus riba nan kreashon. Mas importante, e dia aki ta pa hala atenshon di gobièrnu, polítikonan, institutonan i lidernan di komunidat pa e forma di arte aki i haña sosten pe.
Aki na Kòrsou Teatro KadaKen ta selebrá presentando un obra ku ta konta un historia ku komo komunidat nos tur ta komprondé.
Rumannan Purunchi ta un obra teatral musikal basá riba e buki ‘Rumannan Purunchi – saga di un nèshi tropikal’ di outor Loeki Morales kaminda e ta konta historianan real di infansia di e ku su rumannan na Berg Altena kaminda nan a biba. Milushka Birge, eskritor di e obra a usa e herensha familiar ku Loeki Morales ta deskribí den su buki pa krea un obra ku ta atendé ku temanan kotidiano konosí pa nos manera spiritu komunitario (un ta yuda otro), impotensha, forsa i perseveransha. Tur hende ku a wak e obra kaba sea a rekonosé nan mes historia i esun di nan famia den e obra òf a rekonosé un historia ku nan konosé.
Teatro KadaKen ta haña ku riba dia internashonal di teater Rumannan Purunchi ta e obra apropiá pa pone na atenshon di komunidat ku teater ta aktivo den nos komunidat i ku sosten di komunidat ta krusial pa e por sigui bibu. E funshon di Rumannan Purunchi dia 27 di mart aki ta tambe e último último funshon di e obra aki. Teatro Kadaken ta spera ku tur gremio di sosiedat por haña nan kaminda pa Teatro Aula di Habaai pa wak Rumannan Purunchi.
E elenko di Rumannan Purunchi ta konsistí di sinku aktor: Greysha Niebe, Gian van Eiker, Rachelle Le Blanc, Kionn Yung i Maxine Fabian. Musik ta di Eric Calmes.
Benta di karchi ta na e sitionan di semper: Mensings Caminada, Van den Tweel Supermarket na Zeelandia i Sentro di Pago Tu y Yo. Preis pa karchi pa hóben i adulto ta ANG 25,00 i pa mucha te ku 12 aña ta ANG 12,50. E funshon ta kuminsá 20:00or i porta ta habri 19:30or.
