Den e promé kuartal di e aña akí, a registrá 179 kaso di dengue na e departamento di Salubridat Públiko. Ta trata di hendenan ku a hasi e tèst di dengue. Di 179 hende ku dengue, 3 pashènt a bira asina malu ku nan tabata hospitalisá.

Probablemente e kantidat di kaso di dengue ta mas haltu, pasobra no tur hende ku tin keho ta bai dòkter di kas i hasi tèst. Hopi biaha e kehonan ta bai di mes. Tambe ta asina ku di kada 5 persona ku tin dengue, 4 di nan no ta haña keho.

Ta haña dengue den tur bario na Boneiru i serka tur grupo di poblashon. For di prinsipio di febrüari di e aña akí, e kantidat di kaso nobo di dengue pa siman a keda mas o ménos meskos. Ta registrá un promedio di 17 kaso di dengue pa siman na e departamento di Salubridat Públiko. Dengue no ta plama rápidamente  na Boneiru. E departamento di Salubridat Públiko ta kere ku por lo pronto ta sigui haña dengue na Boneiru tanten ku ta sigui yobe,

Kiko e departamento di Salubridat Públiko ta hasi

Ora un hende tin dengue, un enfermera di e departamento ta yama e pashènt pa duna informashon i tep. Inspektornan di e departamento ta hasi un bishita na kas. Nan ta kontrolá si serka e pashènt na kas òf su bisindario tin kriadero di e sangura di dengue.

Si ta nesesario, nan ta trata e kriadero ku nan haña pa evitá ku e sangura ta sigui plama. Den e promé kuartal di e aña akí, e tim di inspektor a hasi bishita na kas mas ku 100 biaha. Na tur a trata mas ku 400 lugá kaminda e sangura di dengue lo por brui.

Esaki bo mes por hasi

E sangura di dengue ta pone webu den opheto kaminda awa (di yobe) ta keda para. Por ehèmpel bòter bashí, baki di kuminda, tayer di outo. Deshasí di e ophetonan akí na kas! Asina bo ta yuda baha e kantidat di kriadero di sangura di dengue.

Pa mas informashon tokante dengue, preguntanan frekuente i update di kuartal tokante dengue, bishitá http://www.bonairegov.com/sangura