48 BIBIENDA MAS PRONTO DEN ÁREA DI BLUE BAY RESORT

Willemstad – Minister Charles Cooper huntu ku e Servisio di Planifikashon Urbano (ROP), a hasi un inspekshon riba 26 di mart di desaroyo di e proyekto nobo pa konstrukshon di 48 apartamentu na e kancha di gòlf di Blue Bay Curaçao Golf & Beach Resort.

E proyekto aki ta inkluí konstrukshon di 48 apartamentu, situá banda di e kancha di gòlf, distribuí den 4 kompleho independiente i dos piso pa kada edifisio. E proyekto tin dos pisina komun, ‘landscaping’ tropikal, e konstrukshon kompleto ta terminá den 2 aña.

E kasnan aki ta desaroyá ku un vishon dirigí pa futuro, apto pa uso di hür di tempu kòrtiku i tempu largu; e posibilidat pa bibienda tambe tei. Un strategia ku lo mehorá kalidat di bida i e oferta di bibienda den e region di manera supstansial.

E desaroyo aki a start na momentu ku e pèrmit a ser otorgá riba 2 di novèmber 2023. E ta un invershon di 32 mion florin, i ta dunando un impulso na e ekonomia di nos pais.. Durante e proseso di konstrukshon, atenshon spesial ta ser duná na durabilidat di diferente aspekto ambiental, manera un sistema adekuá di drenahe di awa i kreashon di sufisiente espasio di parker.

E proyekto aki ta marká un kontribushon signifikante na kresementu ekonómiko di Kòrsou, dor di kreashon di trabou durante e fase nan di konstrukshon.

Minister Charles Cooper a ekspresá su satisfakshon riba e inisiativa aki, ku ta sperá di duna impulso ekonómiko signifikante na e pais. E proyekto aki ta un realse di e potensial di Kòrsou en general i di Blue Bay Curaçao Golf & Beach Resort en partikular komo un lòk atraktivo pa biba y invertí