(video) Kòrsou tabata éksitoso durante Carifta Aquatic Championship 2024 na Nassau, Bahamas.

Tur landadó di Kòrsou tabata éksitoso durante Carifta Aquatic Championship 2024 na Nassau, Bahamas. E seis atletanan di Kòrsou a kompetí kontra e mihónan di Karibe. A logra bini bèk ku tres medaya. Kòrsou a terminá na di 13 luga.
E eksperensia pa partisipá den e kampionato di Karibe ta úniko. No solamente a midi forsa ku otronan den Karibe pero a sera amistatnan tambe ku otro.
Apesar ku e kampionato a tuma luga den Karibe, e atletanan mester a kustumbrá ku e awa den pisina ku tabata mas frieu ku lokual nan a kustumbrá kune na Kòrsou. E atletanan Sean Vinck, Kyra de Cuba, Jayen Viscaino i Gabrielle Johannes Maduro a logra drecha nan tempu personal durante e diferente kompetensianan. Zina Falbru I Nora van Dijk a partisipá pa Kòrsou den e kompetensia di open water landando den laman un distansia di 5 kilometer. Nan dos tambe ta satisfecho ku nan prestashon. E coachnan Reginaldo Brizuela, Clint Vinck I Harry Huijzers a mira fruta di nan preparashon di lunas largu.
Curaçao Aquatic Association ta hopi satisfecho i ta yama un danki na e atletanan, coachnan, mayornan i sponsors pa nan kontribushon ku Kòrsou por a partisipá i sobresalí na Bahamas.