Ministerio di GMN a lansa lèspakèt Biba Amistat pa alumnonan di skol básiko

Ministerio di GMN a lansa lèspakèt Biba Amistat pa alumnonan di skol básiko

Willemstad – Djárason último a lansa e lèspakèt di e bunita proyekto Biba Amistat. Esaki ta un lèspakèt ku a keda desaroyá netamente pa e di dos siklo di eseñansa di fundeshi. Esaki ta un metodo pa duna muchanan di gupo 6 te ku 8 un vishon di e áreanan di desaroyo propio i resiliensia. Un metodo di lès interaktivo ku ta trata tópikonan manera; pubertat, imahen propio, resiliensia i seksualidat. Meta no ta solamente informá muchanan di siklo dos tokante e tópikonan aki, pero alabes enkaminá dialogo entre mucha ku mucha, ku dosentenan i ku nan mayornan.

Promé ku Biba Amistat a implementá na 2010 e programa Biba Amor skirbí pa señora Jeanine Constansia – Kook kual ta dirigí riba muchanan di skol sekundario. Biba Amor ta un éksito aki na Kòrsou, pero tambe Aruba i Boneiru kaminda por a mira redukshon den embaraso hubenil. Basá riba e éksito aki a desaroyá Biba Amistat pa muchanan di skol básiko. E lèspakèt ta konsistí di manual pa dosente, mayor i alumnonan. Tambe un buki di evaluashon i un buki di tarea pa alumnonan. Señora Aishel Statie a desaroyá e material edukativo kual ta eksaktamente di nivel pa muchanan di skol básiko.

Minister di GMN señor Silvania durante su diskurso a splika ku edukashon seksual den nos komunidat ainda ta tabú i ku e material aki sigur ta yuda den e proseso di edukashon. Minister Van Heydoorn di Enseñansa a mustra ku direktivanan di skol lo hasi uzo di e material aki pero ku alabes mayornan tambe mester ta mas envolví den desaroyo di nan yunan. Señora Pharetza Bertad- Damon kordinadó di e programa finalmente a gradisí señora Aishel Statie pa desaroyá e material i a gradisí tambe señora Jenny Alberto pa e bunita diseño gráfiko.