Minister Pisas a reuní ku Jandino Asporaat relashoná ku daño na Hòfi Mango despues di awaseru eksesivo

Minister Pisas a reuní ku Jandino Asporaat relashoná ku daño na Hòfi Mango despues di awaseru eksesivo

Willemstad –  Minister Pisas huntu ku señor Jandino Asporaat durante un reunion ameno djaluna atardi a deliberá tokante e daño ku e proyekto Hòfi Mango a sufri durante e awaseru eksesivo ku a kai djabièrnè último. Por a mira riba medionan sosial e koriente fuerte di awa ku tabata pasa riba tereno di e proyekto okashonando daño konsiderabel na e restorant i otro instalashonnan riba e tereno. Señor Asporaat a  presentá un plan pa trese posibel kambio na e aktual maneho di awa i Minister Pisas a duna un presentashon di resultadonan di inventarisashon ku Ministerio di GMN a hasi di lokual a sosodé.

A palabrá ku Ministerio di GMN i Ministerio di VVRP huntu ku ekspertonan di e organisashon di señor Jandino Asporaat lo evaluá e aktual maneho di awa na Kòrsou den su totalidat pa basá riba esaki bini ku un plan konkreto pa adaptá esaki den unu duradero na benefisio di Kòrsou. Na mes momentu a traha un sita pa djamars 9 or di mainta na Hòfi Mango kaminda representantenan di e organisashonnan menshoná lo topa otro pa tuma nota di e daño na e hòfi i delineá e siguinete pasonan. Minister Pisas i señor Jandino Asporaat ámbos ta satisfecho ku resultado di e promé reunion aki.