KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNU

FUNDASHON UN BON HÓBEN PA UN BON FAMIA

MINISTERIO KONSERNÍ ENSEÑANSA, SIENSIA, KULTURA & DEPORTE

 

FUNDASHON UN BON HÓBEN PA UN BON FAMIA

PUBLIKÁ RIBA 08 MEI 2024

WILLEMSTAD –  Resientemente Fundashon Un Bon Hóben pa Un Bon Famia a invitá Minister di Enseñansa, Siensia, Kultura i Deporte sr. Sithree van Heydoorn pa un rekorido na su lokalidat na Kaya Seru Grandi na Fuik. E fundashon ta traha básikamente ku e hóbennan di e bario ariba menshoná i algun skol mas. Bou di guia di sr. Majron Maduro ta stimulá e hóbennan positivamente pa kultivá nos tera pa medio di plantamentu di fruta i berdura den nan kunuku. Ta stimulá i formá e hóbennan segun nan talento ku disiplina pa nan por bira siudadanonan ku ta aportá na nan desaroyo i formashon di otro.  

Durante di e bishita minister a haña informashon serka e moderadó di e bishita, kende ta sr. Denzel Russell, alumno di AGO Sint Paulus. Tambe otro miembro di e grupo a duna splikashon di loke nan ta planta i kon mester kuida nan. E fruta- i berduranan ku nan ta planta ta: promèntè, papaya, koko, bakoba, batata, guiambo i flor di Jamaica. A la bes e hóbennan a splika e proseso pa traha djus di flor di Jamaica. Tur esaki ta kultivá bou di guia i huntu ku aporte di mayor- i personanan di e bario di Fuik mes. Riba e tereno mes nan a presentá mas plan i proyekto ku nan tin pa futuro i a pidi pa sondea un forma pa traha huntu ku Gobièrnu. 

Tambe e hóbennan a tene un bunita presentashon pa Minister Sithree van Heydoorn den forma di brassband. Nan a toka un par di piesa lokal riba nan hèmber- i blekinan spesial trahá den forma di brassband.  

Minister van Heydoorn ta sumamente impreshoná di e bunita programa ku e hóbennan a presentá na dje. P’esei Minister a primintí nan ku e ta bai bin bèk ku Minister di Asuntunan Sosial i Minister di Salubridat, Naturalesa i Medio Ambiente pa nan eksperensiá e programa di Fundashon Un Bon Hóben pa Un Bon Famia. I asina komo Gobièrnu ta wak un forma pa traha di forma interministerial huntu ku e fundashon. 

— 

 

639114718427035"
639114718427035"