MESTER EVITÁ KU FFK TA KEDA EKSPULSÁ DI FIFA!

MESTER EVITÁ KU FFK TA KEDA EKSPULSÁ DI FIFA!
Djaweps último dia 9 di mei, direktiva di Federashon Futbòl Kòrsou (FFK) a risibí un di seis (6) karta di FIFA indikando ku no por trese kambio na e konstelashon aktual di direktiva ni pone elekshon nobo te na momentu ku e statutonan nobo keda kla. FIFA a suprayá tambe ku tur e atenshon i enfoke di FFK mester ta dirigí riba e satutonan nobo ku mester keda notariá fin di e luna di mei aki. Pa e motibu aki, direktiva di FFK a tuma e desishon unánime di kanselá e reunion ku tabata konvoká pa algun miembro di FFK riba dia 10 di mei último.
Ta di lamentá ku konstantemente ta yag riba presidentenan di turno i ku a mara e kontinuashon di Kampionato Hubenil na e retiro di Presidente di FFK, señor Ramiro Griffith, siendo e muchanan no tin nada di haber ku loke ta pasando. Mas aun, ku fin di luna aki e statuto nobo ta keda notariá i ku por yama un elekshon nobo den tur trankilidat. Pues direktiva no ta wak e hansha ku tin pa retirá un presidente den porta di un elekshon. Úniko kos ku por pensa ta e polítika barata ku a bin ta práktika pa hopi aña kaba.
Netamente e tipo di aktonan aki e direktiva di FFK ke prevení, pa evitá posibel ekspulshon di nos federashon for di FIFA i pèrdidá di empleo di tur esnan ku ta laborá den nos federashon. Nos selekshon nashonal ku tin kompromisonan internashonal otro luna, tambe por keda pèrhudiká.
P’esei sr. Griffith ta hasi un yamada na e miembro di e grupo chikí di miembro pa por fabor laga nos mantené trankilidat den nos organisashon i laga nos ban traha huntu pa bienestar di nos federashon. Fin di luna aki, ora ku e statuto nobo ta kla, lo yama un reunion pa ratifiká esaki i despues organisá un elekshon kaminda miembronan por skohe e kandidato ku nan ta haña mihó pa e puesto di presidente i direktiva.
Mientrastantu, presidente di FFK ta hasi un petishon na tur hungadó, mayor i dirigentenan pa laga e partidonan di Kampionato Hubenil tuma lugá den tur trankilidat sin ku mester perhudiká nos muchanan. Direktiva ta trahando duru pa trese pas i trankilidat den nos federashon i ta sigui hasi su máksimo esfuerso pa bala por kuminsá lora atrobe. Den e próksimo dianan lo sigui e desaroyonan di nos organisashon di aserka p’asina evitá un ekspulshon di nos federashon dor di FIFA.
