Nos pais ta hoga bou di sushi !!
Nos pais ta hoga bou di sushi !!
Un biaha mas sra. Pauletta ta hasi un yamada na minister Silvania i Pisas pa ku e estado sushedat di nos Pais. Un pais sushi tin efekto direkto riba e salú i bienestar di su siudadanonan.
Resientemente sra. Pauletta a pone atenshon riba e situashon di Dam pretu, ku ta un problema pa e abitantenan di e barionan pegá ku dam pretu. Ademas di keho di salú, e bisiñanan tin molèster den nan forma di biba. Sra. Pauletta ta kontentu pa mira ku abitantenan mes tambe ta formalisando nan akshonnan, pa asina eksigí pa Gobièrnu tuma ehekutá e plannan ku tin.
Awor parlamentario Pauletta kier pone tambe atenshon riba ‘zwerfvuil’, kantu di kaya.
Spesífikamente e kaminda na altura di Ser’i Dòmi i Vèlt Salú. E kaminda aki, ademas di ta keda usá hopi, e ta konektá diferente ruta. Esaki ta pone ku e tráfiko riba e kaminda aki ta haltu. E kaminda aki ta un doló den wowo di tantu abitantenan di e área komo e usuarionan di e kaminda, pa e kantidat di sushi ku tin. Ta bal’é la pena menshoná ku e kaminda aki no ta e úniko kaminda ku ta sushi. A bira un kustumber tristu di mira sushi kantu di kaminda.
Sra. Pauletta ta di opinion ku mester bin ku un maneho struktural di limpiesa di tur kaya, no solamente kòrta yerba. Esaki mester bai man den man ku un kontrol estrikto riba kon ta transportá sushi riba kayanan públiko. Den kuadro di esaki sra. Pauletta a manda algun pregunta pa e dos ministernan responsabel.
Na: Presidente di Parlamento di Kòrsou
Sra. Ch. America-Francisca
Wilhelminaplein 4
Presente
Willemstad, 14 Mei 2024
Tópiko: Pregunta na Minister di Salubridat, Medio Ambiente i Naturalesa Sr. J. Silvania i sr. G. Pisas riba: Sushedat riba e kaminda di Nijlweg, na altura di Ser’i Dòmi i Vèlt Salú.
Honorabel sra. America-Francisca,
Señora presidente, pa medio di e karta aki suskrito ke hasi uso di artíkulo 96 di Reglamentu di Òrdu i ta pidi enkaresidamente pa bo persona por dirigí e karta aki ku e Tópiko: ‘Sushedat riba e kaminda di Nijlweg, na altura di Ser’i Dòmi i Vèlt Salú.’ Na Minister di Salubridat, Medio Ambiente i Naturalesa Sr. J. Silvania i sr. G. Pisas.
Atentamente,
Ana Maria Pauletta
Miembro di Parlamento, Partido Alternativa Real
