REUNION KU CEO DI CHATA
MINISTERIO KONSERNÍ ENSEÑANSA, SIENSIA, KULTURA & DEPORTE
REUNION KU CEO DI CHATA
PUBLIKÁ RIBA 16 MEI 2024
WILLEMSTAD – Minister di Enseñansa, Siensia, Kultura i Deporte sr. Sithree van Heydoorn a será konosí di forma ofisial ku e CEO nobo di Curaçao Hospitality and Tourism Association (CHATA), sra. Anuschka Cova. Sra. Cova tabata akompañá pa dos miembro di direktiva di CHATA, esta sra. Mimi Ludge-van Spijker (presidente di CHATA) i sr. Jaime Osma (miembro di hunta di CHATA).
Un punto di agènda ku a kòmbersá riba dje ta e parti di edukashon i formashon di nos hóbennan den e área hospitalario. Esaki ta un punto di gran importansia pa desaroyo di nos pais, komo ku e pilar ekonómiko di turismo ta kresiendo i mester organisá esaki di un forma strukturá. Hunto a kuminsá wak un manera pa amplia e taskforce ku CHATA. Pues pa inkorporá mas persona den e área di enseñansa i kultura pa asina aportá ku ideanan nobo.
Minister Sithree van Heydoorn a ekspresá ku e ta habrí pa traha huntu ku e CHATA, CTB i Ministerio di Desaroyo Ekonómiko pa kanalisá i unifiká formashon di nos hendenan pa nan por traha den e sektor di hospitalidat. CHATA tambe a ekspresá ku nan ke rebibá e bishitanan na skolnan sekundario kaminda ta duna informashon na nos alumnonan. A bati kabes di forma espontaneo i a yega na modelonan kaminda por hasi esaki di un forma atraktivo pa hóben i adulto. Tambe a kòmbersá riba tópikonan manera estudio, preparashon i kurso di nos propio hendenan komo ku, segun sifranan pa aña 2026, lo bai tin mas o ménos un total di 4000 kamber disponibel riba nos isla.
A yega na un palabrashon konkreto ku ta bai sondea e posibilidat pa traha huntu i tambe traha huntu pa loke ta trata di bishita na skolnan sekundario. Minister Sithree van Heydoorn ta masha kontentu ku e bishita i a deseá sra. Cova éksito ku e trabounan komo CEO di CHATA.
—
KOMUNIKASHON
**Riba e potrètnan athunto por tuma nota di e bishita.


