Minister di Finansa ta desmentí mentiranan di sra. Camelia-Römer kategórikamente
Minister Javier Silvania
Minister di Finansa ta desmentí mentiranan di sra. Camelia-Römer kategórikamente
Willemstad, 18 di mei 2023 – Resientemente señora Suzanne Camelia-Römer a bisa ku Minister di Finansa, señor Javier Silvania, a duna informashon inkorekto na ARC relashoná ku e kuenta anual 2022. Den kuadro di esaki Minister Silvania ta konsiderá sumamente importante pa desmentí e mentiranan di sra. Camelia-Römer.
Danki na e konstrukshon diabóliko di sra. Camelia-Römer, awe CMC no ta propiedat di gobièrnu. Danki na sra. Römer ku gobièrnu a trasladá e hospital nobo na HNO Vastgoed sin sera un akuerdo di fiansa promé. Sra Camelia-Römer mihó konosí komo Suzy Lange Vingers ta hasi honor na su nòmber. Ku hanskun di felpa bistí, sra. Römer a pasa pueblo di Kòrsou un “fastball”.
Den e rapòrtnan di ARC di e kuentanan anual di 2020 te ku 2022 por lesa ku:
“De langlopende lening aan HNO Vastgoed N.V. ten bedrage van NAf. 393,1 miljoen is in strijd met de bepaling in de Landsverordening Comptabiliteit 2010 verstrekt zonder dat een overeenkomst is gesloten door de minister van Financiën”.
Di akuerdo ku sra. Camelia-Römer, esaki no ta kuadra i Minister di Finansa aktual a duna informashon inkorekto na ARC.
Pa por desbaratá e mentiranan di sra. Camelia-Römer nos ta bai den historia.
Riba 17 di mei 2019, SOAB a kalkulá un suma provisorio di 342,5 mion florin kual HNO Vastgoed mester a tuma over for di e fiansa ku gobièrnu a hasi pa traha hospital nobo.
HNO Vastgoed a bira doño di e kompleho di hospital.
Den su rapòrt di 17 di mei 2019, SOAB a proponé pa inkluí e suma na balor di 342,5 mion florin, komo un kondishon di e ‘Hoofdlijnenakkoord Erfpachtuitgifte’, i a konsehá pa formalisá esaki despues den un akuerdo di fiansa.
Manera ta konosí, entre otro, sra. Camelia-Römer i sr. Kenneth Gijsbertha a firma e ‘Hoofdlijnenakkoord Erfpachtuitgifte’ (entre Gobièrnu i CMC), promé ku Gobernador di Kòrsou a firma e ‘machtigingslandsbesluit’. Sin e ‘machtigingslandsbesluit’ ningun gobernante por firma un akuerdo òf kontrakt i di e forma ei mara pais Kòrsou na kualke obligashon. Gobernador di Kòrsou, pa gran disgustu di sra. Camelia-Römer, a ninga di firma e machtigingslandsbesluit i (via Konseho di Minister) a manda e landsbesluit pa Rei Willem-Alexander destruí esaki. Gobernador ta di opinion ku e proseso pa otorgá e fiansa na CMC, no a tuma lugá konforme Rijkswet Financieel Toezicht.
Riba 8 di òktober 2019, SOAB a aktualisá e montante ku mester wòrdu hinká den e schulderkenningsovereenkomst (REKONOSEMENTU DI DEBE). E suma a keda fihá na 412,8 mion florin.
E suma ta mas haltu kompará ku 17 di mei 2019 pa motibu ku Gobièrnu a duna CMC diferente voorschot despues di 17 mei 2019. SOAB a indiká ku ta trata di un suma provisorio i a proponé pa laga determiná e gastunan real despues.
Riba 16 di mart 2020, HNO Vastgoed a emití un rekonosementu di debe na balor di 412,8 mion florin. Es desir ku gobièrnu anterior no a laga aktualisá e suma for di 8 òktober 2019. Ademas, HNO a deklará lo siguiente den su rekonosementu di debe:
1. Riba e promé petishon di Gobièrnu, HNO Vastgoed, lo laga un notario registrá su deklarashon via di un akta outéntiko;
2. Riba e promé petishon di Gobièrnu, HNO Vastgoed, lo duna garantia pa kumplimentu debido ku su obligashonnan, manera ta stipulá den e rekonosementu di debe. Esaki lo tuma lugá, tumando na konsiderashon, ku lo rekerí outorisashon adelantá di finansiadónan di HNO Vastgoed, ku tin entre otro, e promé i segundo derecho di hipoteka riba e erfpacht. Den ousensia di e outorisashon menshoná, HNO Vastgoed lo no ta obligá pa duna garantia na Gobièrnu.
Minister Silvania ke remarká ku Gobièrnu nunka a aseptá formalmente e rekonosementu di debe ku HNO Vastgoed a elaborá. Ademas, nunka un notario a registrá e rekonosementu di debe, i pues te awor HNO Vastgoed no a duna NINGUN garantia di pago na Gobièrnu. Miéntras ku e konsorsio (enkabesá pa Vidanova) ku ta finansiadó minoritario di hospital si tin garantia di pago.
Aktualmente, Gabinete Pisas 2 ta den proseso pa trese un solushon kompletu pa CMC, kaminda lo evaluá e struktura di finansiamentu. Ta remarkabel ku Gobièrnu mester karga e gran mayoria di gastunan di konstrukshon di e edifisio di hospital, sin ku Gobièrnu ta doño di e edifisio di hospital òf sin tin ningun garantia ku lo HNO Vastgoed lo paga gobièrnu e suma ku debé. E puntonan aki tambe a bini dilanti durante e enkuesta parlamentario.
Sra. Camelia-Römer, ta alegá ku e akta di rekonosementu di debe redaktá pa gerensha di CMC Vastgoed ta sufisiente pa kumpli ku nos leinan di kontabilidat. ARC ta mira esaki diferente. Minister di Finansa, Javier Silvania, ta di akuerdo ku ARC, i ta di opinion, ku e rekonosementu di debe redaktá pa CMC Vastgoed no ta sufisiente pa kumpli ku nos leinan di kontabilidat.
Den un otro komunikado lo amplia riba e punto di Roadmap i e punto di e landsbesluit pa e fiansa di Giro.
