Tur aña mundialmente nos ta produsí mas ku 380 mion tòn di plèstik. Mitar di esaki ta pa un solo uso. Esaki ta nifiká ku ya kaba nos ta tir’é afó despues di us’é un biaha so! Pa motibu ku ta reusá solamente 9% di tur plèstik, e parti mas grandi ta resultá na nos sitionan di depositá shushi. Òf pió ainda, komo shushi tirá abou riba kaya òf den naturalesa i e ta kontaminá nos oséanonan. Pa engrandesé konsiensia tokante e kontaminashon akí, dia 25 di mei nos ta selebrá Dia Internashonal Liber di Plèstik.

Afortunadamente na Boneiru ya kaba nos a pone algun paso pa eliminá plèstik. Desde dos aña Boneiru ta prohibí benta di saku, richi, kos pa drai bibida, kuchú, fòrki i kuchara di plèstik desechabel i empake di kuminda di fom. E medidanan akí a yuda, pero e problema di shushi di plèstik tirá riba kaya i den naturalesa ta keda eksistí.

‘Te ainda nos ta mira hopi shushi di plèstik tirá abou den nos barionan, kantu di kaminda i riba bich. Riba bich ta trata di tantu plèstik ku a drif subi tera, komo plèstik ku ta prosedente di nos mes, ku ta oumentando’, segun diputado Cicilia. ‘Pero si nos wak solamente e artíkulonan prohibí, manera richi, kos pa drai bibida i kuchú, kuchara i fòrki, e ora ei nos ta mira un tendensia ku esakinan ta birando ménos. Esaki ta proba ku nos esfuersonan ta funshoná i ku nos tin ku kontinuá ku e aserkamentu akí.’

Organisashonnan di boluntario regularmente ta organisá akshon di limpiesa riba nos bichnan. Nos tur tambe por kontribuí ku un granito pa logra un Boneiru mas bunita i mas limpi. Partisipá na un akshon di limpiesa, nenga di usa plèstik di un solo uso i skohe pa produktonan reusabel. Huntu nos por hasi un impakto importante riba konservashon di nos bunita naturalesa. Laga nos pone nos mannan huntu pa un Boneiru bunita i liber di plèstik.