KÒRSOU POSISHONÁ FUERTE DURANTE SIDS4

Willemstad- For di 26 te ku 30 di mei último, Minister Cijntje a biaha huntu ku Promé Minister Gilmar Pisas i un delegashon di Kòrsou pa Antigua i Barbuda kaminda nan a partisipá den e di 4 konferensha internashonal tokante SIDS (Small Island Developing States). Konferenshanan di SIDS ta keda organisá pa Nashonnan Uní  kada 10 aña ku e meta pa bini huntu i atendé ku temanan ku ta regardá islanan den desaroyo i nan desafionan den e trayekto di desaroyo akí.

Durante e konferensha SIDS4, Minister Cijntje a partisipá na diferente seshon di negosiashon, diálogonan interaktivo, pènel i deliberashonnan super interesante pa e desaroyo di Kòrsou. Minister Cijntje a forma parti tambe komo panelista durante un di e pènelnan durante SIDS4 ku a trata e retonan ku islanan ta enfrentá pa alkansá un transishon pa energia renobabel (What are the challenges and the projects needed to help small islands achieve the transition to renewable energy).
Huntu ku e seshonnan plenario, SIDS4 a konta tambe ku mas di 200 eventonan mas chikitu ku tabata tuma lugá paralelo i kaminda organisashon i empresanan partisipante por a profundisá riba temanan di interes, pone atenshon riba solushonnan konkreto i stimula kolaborashon. Durante e diferenté seshonnan kaminda e delegashon di Kòrsou a partisipá, nan a duna un bista kla kiko tur Kòrsou ya ta hasiendo pa generá data i a proponé pa uni forsa ku otro islanan ku tin mesun retonan konstitushonal ku nos pa asina traha huntu i yega na akuerdonan riba temanan fundamental pa desaroyo. Tambe, e delegashon di Kòrsou a demostrá plannan pa Kòrsou su transishon energétiko 2045 i a para ketu huntu ku e otro islanan kon teknologia por yuda nos desaroyo ekonómiko, sosial i kultural. Pues, Minister Cijntje i e delegashon di Kòrsou sin mas a laga un bon impreshon atras durante SIDS4 i a pone Kòrsou un biaha mas riba radar.

Okashonnan manera esaki mas ku klaro ta e esenario perfekto tambe pa Minister Cijntje por tene reunionnan bilateral ku mandatarionan di diferente pais di interes manera tabata e kaso e biaha akí ku mandatarionan di Sürnam, Jamaica i Antigua & Barbuda. Un di e personanan ku tambe Minsiter Cijntje a reuní kuné durante e konferensha akí tabata nos propio diáspora, èks Promé Minister di Kòrsou, Eugene Rhuggenaath kende aktualmente ta trahando komo direktor ehekutivo na World Bank. Den e kombersashon akí, Minister i sr Ruggenaath a papia di maneranan kon pa krea akseso pa Kòrsou na Programanan di World Bank i a palabrá di sigui ku e kombersashonnan akí pa por yega na akshonnan mas konkreto pa e progreso di Kòrsou.

E delegashon di Reino tabata bon representá durante e konferensha SIDS4, ku hóbennan di St. Maarten, Boneiru, Hulanda i mas ku klaro tambe di Kòrsou. Kevin Eustatia ku ta representante di Reino den Nashonnan Uní pa asuntunan di hubentut a liderá a delegashon di hóbennan. Di Kòrsou e hóben Guillendry Doran a partisipá na tur e seshonnan i a siña masha hopi mes di kon mundu ta yega na akuerdonan i kon esakinan tin impakto riba nos komo isla chikí. Den klousura di e konferensha SIDS4, Nashonnan Uní a rekonosé e partisipashon impreshonante di Reino ku un bon representashon di nos hóbennan. Ademas e delegadonan di Reino a felisitá Kòrsou pa un presensia sólido, stratégiko i ku kontenido.

E konferensha SIDS4 a klousurá dia 30 di mei último ku aseptashon di un akuerdo ku ta karga e abreviashon ABAS, Antigua and Barbuda Agenda for Small Island Developing States. ABAS ta karga nòmber di e isla ku tabata anfitrion di SIDS4, i e ta un deklarashon pa garantisá prosperidat resiliente di e islanan i un promesa pa yuda e islanan alkansá nan prioridatnan den e próksimo 10 añanan. Na e okashon akí lidernan mundial a deklará ku, despues di 3 dekada i 3 diferente programa di akshon, SIDS ta keda un kaso spesial den área di desaroyo sostenibel. Apesar di esaki, rekonosementu di e vulnerabilidat úniko di nos islanan no ta nifiká nesesariamente ku SIDS ta suak òf ta falta potensial. E ta nifiká mas bien ku SIDS ta keda impaktá di un manera desproporshonal den término di desasternan físiko i ekónomiko. Pues ku esaki den mente, mester por asistí SIDS pa diversifiká nos ekonomianan, reforsá nos kapasidat di produkshon i fasilitá e akseso na finansiamentu konsenshonal pa SIDS.