Ramiro Griffith destituí komo presidente di FFK
Ramiro Griffith destituí komo presidente di FFK
Brievengat: Djabièrnè último dia 31 di mei 2024, miembronan afiliá na Federashon Futbòl Kòrsou a pasa un moshon di deskonfiansa kontra di Sr. Ramiro Griffith.
Esaki ta nifiká ku di forma inmediato sr. Griffith a keda destituí for di e funshon di presidente di FFK i no por presentá niun kaminda komo presidente di e Federashon.
Konforme artíkulo 36 insiso 4 di e statuto FFK, por pasa e moshon si 2/3 parti di votonan válido vota pro e moshon di deskonfiansa kontra presidente di FFK.
Djabièrnè último tabatin un total di 21 voto i pa e moshon por a pasa mester tabatin 2/3 parti kual ta 14 voto. Un total di 19 voto a keda depositá pro e moshon di deskonfiansa kontra Presidente di FFK i basá riba e resultado aki, sr. Ramiro Griffith a keda destituí komo presidente di FFK. Konforme nos Statuto e desishon aki ta drenta na vigor inmediatamente.
E desishon aki a keda mandá por eskrito pa sr. Griffith i tambe pa sobrá miembronan di direktiva di FFK. Tambe e miembronan afiliá a manda un karta pa FIFA, CONCACAF, CFU i Sekretario General FFK.
Aktualmente a sobrá 3 miembro di direktiva di FFK ku lo keda den funshon i lo tin ku traha huntu ku personalnan di FFK.
Miembronan afiliá lo keda mantené tur “stakeholders” na altura di tur e desaroyonan rondó di FFK i alabes ta deseá nos selekshon nashonal tur klase di éksito pa ku nan próksimo kompromiso ku ta dia 5 di yüni kontra di Barbados enkonekshon ku klasifikashon pa mundial 2026.



