Bishita na Universidat di Luxembourg

Bishita na Universidat di Luxembourg
WILLEMSTAD – Minister di Enseñansa, Siensia, Kultura i Deporte (ESKD) sr. Sithree van Heydoorn huntu ku su delegashon a bishitá universidat di Luxembourg. Hefe di ofisina di teknologia di e universidat sr. Christophe Haunold a tene un presentashon di e universidat ku tin 20 aña di eksistensia. Na mes momentu a sera konosí ku promé konsehero di gobièrnu di investigashon i enseñansa avansá di e universidat sr. Romain Martin. Durante di e bishita a kombersá riba temanan manera programa grátis di idioma ku nan ta ofresé, populashon di alumnonan, investigashonnan akadémiko ku ta di balor pa e universidat, programa di interkambio i mas.
Mèrdia a sigui ku un almuerso huntu ku e universidat i e Prínsipe di Luxembourg kaminda Minister di ESKD i su delegashon a sera konosí ku e su ekselensia prínsipe sr. Louis X. M. Guillaume. Durante di atardi i den kompania di e prínsipe Minister i su delegashon a haña un rekorido den e Universidat di Luxembourg.
*Riba e potrètnan por tuma nota di e bishita, rekorido i almuerso huntu ku su ekselensia prínsipe sr. Louis X. M. Guillaume