Kosto di Bida Ta Sigui Haltu: Kiko Minister ta Hasiendo?

Kosto di Bida Ta Sigui Haltu: Kiko Minister ta Hasiendo?

Parlamentario Steven Croes ta hala atenshon di mandatario Ruisandro Cijntje ku e situashon no por sigui asina

 

“Ekonomia no ta turismo so”. Esaki segun parlamentario Steven Croes, kende tambe a tene su disertashon resientemente den parlamento despues di kontestashon di minister di ekonomia Ruisandro Cijntje. E ta bisa ku último tempu ta pone hopi énfasis riba turismo, ku ta riba bon kaminda, pero ta lubidá ku tin mas sektor ku ta importante pa pone ekonomia drai i prosperá.

 

Tambe sr. Cijntje ta mustra dede kontinuamente riba inflashon, pero sin menshoná faktornan ku SI e por tin influensia riba dje pa medio di su maneho.

 

Croes ta indiká ku preis di komestibel den rèkinan di supermerkado ta haltu ketubai i hopi hende den komunidat tin hamber. Enfoke di e minister no ta riba ehersisionan serio pa mitigá faktornan ku ta kontribuí na esaki.

 

Un di e faktornan ku ta pisa signifikantemente riba preis di lokual komunidat ta paga na kaha pa entre otro komestibel, ta e porsentahe di omzetbelasting (OB) i invoerrechten ku ta muchu haltu i ku tin ku ser ahustá. Den e afan aki, Croes ta puntra sr. Cijntje, si e tin atenshon pa esaki i si mas importante ainda, e ta den kombersashon ku minister di finansa Javier Silvania pa yega na desishonnan ku por marka e diferensia.

 

Tambe Croes ta puntra e mandatario i indirektamente su kolega Silvania: si ta bèrdat ku kaha di gobièrnu ta yen di plaka paso ta kobrando impuesto na gran eskala, dikon boso no ta buskando maneranan pa aliviá e pueblo?

 

Parlamentario Croes ta kuestioná, kon largu mas komunidat lo por karga ku preisnan astronómiko ku ta afektá kosto di bida? Minister ta bai aktua?