Hóben entrenadónan yu di Kòrsou na kabes di ‘Feyenoord Camp Curaçao 2024’
Hóben entrenadónan yu di Kòrsou na kabes di ‘Feyenoord Camp Curaçao 2024’
Willemstad – Ayera den oranan di mèrdia a tuma lugá un rueda di prensa tokante bishita di e klup di futbòl Oropeo, Feyenoord. E inisiativá pa trese e proyekto di entrenamentu e aña aki na Kòrsou, a sali for di dos hóben entrenadó yu di Kòrsou, Dencho Narcisio i Justin Tyrol ku ta representá e klup di futbòl.
Durante e rueda di prensa por a konta ku presensia di Minister di desaroyo Ekonómiko, Ruisandro Cijntje. Minister a duna di konosé ku e proyekto di Feyenoord representá pa e dos hóben entrenadónan lo no solamente yuda nos krea lidernan den nos hubentut, pero tambe lo yuda alsa e nivel di praktiká deporte entre nos hóbennan. Tambe e la menshoná ku e inisiativá pa trese e proyekto e aña aki na Kòrsou lo aporta na engrandesé Kòrsou komo pais i tambe hasi soño di e hóben futbolistanan na Kòrsou un realidat. Pa e motibu aki ta imporante pa aportá na proyektonan manera ‘Feyenoord Camp Curaçao 2024’ i na e manera aki duna sosten na nos hóbennan.
E idea pa trese e programa di entrenamentu Kòrsou e aña aki a bini debí ku semper Dencho i Justin tabata bai afó i duna entrenamentu den otro paisnan i a bisa dikon nunka a trese e proyekto aki na nos propio pais. Na Kòrsou tambe tin hóbennan ku soño i ku talento. Di e forma aki a traha un plan i presentá esaki na Feyenoord di kual Feyenoord a bai di akuerdo kuné pa asina generá talento nobo no solamente di otro paisnan pero tambe di Kòrsou.
E entrenamentu na Kòrsou lo ta basá riba un metodologia ku ta wòrdu uzá na Hulanda di kual ta train hóbennan di 7 te ku 21 aña. Pa medio di e proyekto aki, entrenadónan i hóben futbolistanan awor lo tin akseso na programashon di entrenamentu na nivel internashonal. E kapasidat di partisipashon ta na 150 mucha i hóben entre 6 pa 18 aña. Entrenamentu lo kuminsá djaluna 8 di yüli i lo terminá 12 di yüli próksimo.
E programashon ta konsistí di dos training pa dia di 1 ora i mei di kual riba mainta lo enfoká riba abilidat tékniko i na final di dia lo enfoká riba e tékniko di bala i kon ta para riba vèlt. Tambe djadumingu próksimo lo invitá 10 coach lokal ku ta bin yuda di kual lo bai duna un kurso rápido di kon ta train di tal manera, kon pa traha un plan anual, i otro abilidat tékniko ku e hóbennan ta siña na Hulanda.
Oportunidat pa wòrdu di ‘Scout’
E meta general di e Feyenoord Camp ta pa hisa nivel di preparashon di e hóbennan. Mínimo 1 i máksimo 2 hungadó, lo haña oportunidat pa train na e klup Feyenoord na Hulanda. Feyenoord lo sòru pa e mió hungadó bai un siman Hulanda. Na Hulanda e hóben lo partisipá den tres training, un partido di entrenamentu i kisas tambe un wega di kompetensia. Feyenoord lo kubri tur gastu pa e hungadó. E temporada den kual e hóben lo bai Hulanda mester wòrdu determiná ainda huntu ku Feyenoord i e mió hungadó. E proyekto aki a wòrdu patronisá pa Curaçao Tourist Board i Crown Automotives.
