MINISTER CIJNTJE TA SATISFECHO KU KÒRSOU SU PARTISIPASHON NA CANTO 39

CANTO su reunion general na 2025 lo ta na Kòrsou!

Willemstad – Minister di Desaroyo Ekonómiko Ruisandro Cijntje a kulminá un siman eksitoso na Miami, huntu ku kolega Charles Cooper, Minister di Tráfiko, Transporte i Planifikashon Urbano, i un delegashon konsistiendo di empresarionan den sektor di Telekomunikashon i IT, partisipando na e di 39 edishon di CANTO. CANTO ta para pa Caribbean Association of National Telecommunications Organizations.

Mientras ku kolega Cooper su enfoke tabata mas riba infrastrukturanan di Telekomunikashon, minister Cijntje a enfoká mas kon pa usa e infrastrukturanan aki i nan fasilidatnan pa stimulá desaroyo ekonómiko na un forma aselerá. E konferensia i ekshibishon anual di CANTO su tema e aña aki tabata “Towards a Sustainable Digital Economy”.  Manera tabata e kaso na 2023, e sektor di IT, ku ta desaroyando komo e di 4 pilá di nos ekonomia, a partisipá ku un stènt atraktivo i a forma parti di vários pènel i reunionan importante pa atendé ku retonan den e mundu di telekomunikashon den Karibe i alabes hasi uso di oportunidatnan ku e enkuentro aki ta trese. Mas o ménos 15 empresa di Kòrsou di e sektor di ICT (Information and Communications Technology) a partisipá na CANTO 39!

Durante di e bishita di minister Cijntje na CANTO39 na Miami, el a hiba kombersashon ku e Sekretario General di CANTO, señora Teresa Wankin, i tambe ku e presidente di CANTO, señor Mike Antonius, relashoná ku Reunion General di CANTO ku lo tuma lugá na Kòrsou na yanüari 2025, manera a keda anunsiá aña pasá.

Banda di esaki minister Cijntje i minister Cooper a kombersá ku representante di Caribbean Telecommunications Union (CTU) señor Gary Kalloo riba e balor agregá ku un eventual miembresia di CTU lo por tin pa Kòrsou. Den e kombersashon aki a bin dilanti ku membresia di CTU lo por duna Gobièrnu di Kòrsou e oportunidat di tuma desishonnan riba nivel stratégiko i tambe nivel di maneho den áreanan di regulashon, infrastruktura i konektividat en general di telekomunikashon, internèt i telefòn portátil den region di Karibe. A palabrá ku señor Gary Kalloo ku e lo manda un invitashon pa membresia di CTU pa Gobièrnu di Kòrsou den luna di ougùstùs.

Minister Cijntje mas aleu a hiba kombersashon ku representantenan di Cable & Wireless (Flow), kaminda minister Cijntje a hasi un petishon pa konsiderá e área di Karibe komo un totalidat ora ta hasi invershonnan. Bentaha di esaki ta ku invershonnan ta bira mas rendabel kompará ku ora e enfoke ta solamente riba invershon na nivel di un isla mirando ku e populashon ta mas chikitu. Resultado di invershon dirigí riba mas isla ta hasi e preis pa e servisio di konektividat mas kompetitivo ku ta kondusí na mas penetrashon di konekshon i mas uso di internèt i data komo instrumento pa stimulá inovashon den sektornan ekonómiko.

Mas aleu minister Cijntje a kombersá ku un empresario di Haiti, Jean Marie Altéma, di “Music Technology” ku a mustra interes pa agregá músikonan di Kòrsou na un plataforma di músika internashonal. Esaki lo duna nos industria di músika ku ke eksportá un plataforma kaminda nan por keda asesorá, hiba kombersashonnan ku otro ‘stakeholders’ den e área di músika, haña kapasitashon musikal i tuma parti na konferensia 24/7. E invitashon a keda hasí pa partisipá na nan konferensia den novèmber benidero pa asina Kòrsou keda lansá komo pais ku ta forma parti di e plataforma di Music Tech. Curaçao Music Support and Export Office lo sigui ku e follow-up.

Riba e último dia di CANTO 39, minister Cijntje a tene un tremendo presentashon kaminda el a elaborá riba e importansia pa islanan chikitu hasi uso di teknologia pa por stimulá desaroyo ekonómiko. Durante di su presentashon minister a elaborá kon e echo ku refineria a stòp su operashon, ku tabata forma 10% den nos ekonomia, a afektá Kòrsou i tambe kon e situashon di e pandemia COVID-19 a impaktá nos ekonomia, ku a kondusí na su maneho riba término kòrtiku dirigí riba stimulá turismo i kaminda a apliká teknologia pa por a stimulá e kresementu den e sektor. “Kòrsou ta e promé pais na mundu ku a hasi uso di e teknologia di “Bio matrix face recognition” pa asina biaheronan por drenta Kòrsou sin tin ku pasa dor di imigrashon”, minister Cijntje a partisipá. Tambe minister Cijntje a indiká otro trayektonan kaminda ta hasi uso di teknologia pa hasi e eksperensia di un turista riba Kòrsou mas plasentero. Den futuro lo por husa IT den kombinashon ku AI pa por hasi eksperensia di turistanan mas plasentero dor di, por ehèmpel, hasi uso di robòt pa komuniká ku turistanan Asiátiko den nan idioma i asina stimulá mas turista ku no ta papia idioma konosí pa bin bishita nos isla i sinti nan mesora na kas.

Mas aleu minister Cijntje a ilustrá e avansenan den e sektor di IT kaminda el a mustra nan kontribushon na ekonomia komo eksportadó, prinsipalmente pa e área di Karibe i Latino Amérika. Banda di esei minister Cijntje a ilustrá plannan konkreto ku e sektor di IT tin den añanan benidero pa asina pèrkurá di sigui krese den e servisionan ku aktualmente nan ta brinda den nos región.

Por último minister Cijntje a elaborá durante su presentashon riba su intenshon pa krea un “business model” nobo dor di promové uso di e domain name curacao.cw pa atraé negoshi for di eksterior ku ke usa Kòrsou su nòmber di domain pa hasi negoshi. Banda di esaki lo usa e domain curacao.cw komo un instrumento pa merkadeo di Kòrsou dor di stimulá nos mes negoshinan pa hasi uso di e domain name .cw pa hasi Kòrsou mas konosí den eksterior.

---