Apertura di kantor pa ‘Falsidesk’ na Curaçao International Airport

WILLEMSTAD – Den kuadro di ‘Plan van aanpak Versterking Grenstoezicht’ Kuerpo
Polisial Kòrsou a inisiá e proyekto di ‘Falsidesk’ na airport CUR. Falsidesk ta enkargá ku
investigashon di dokumentonan ku ta falsu i òf ku tin indikashon ku ta falsu. No solamente
pasport, pero kualke otro dokumento ku mester wòrdu verifiká ku e dokumento a keda
otorgá di forma ofisial. E departamentu di Falsidesk ta kai bou di Unit Vreemdelingen
Toezicht & Grensbewaking, di Kuerpo Polisial. Den e departamentu aki tin un eksperto di
KMar – DOC 3 trahando i e ta keda asistí pa koleganan lokal ku tin un sertifikado di DOC 2.
Kòrsou tin aktualmente 7 kolega di Imigrashon ku a terminá e kurso di DOC 2 ku éksito.
E fasidesk ta okupá ku personanan entrená spesialmente pa rekonosé e señalnan di
falsifikashon den dokumentonan di biahe. Nan ta uzá teknologia avansá i téknikanan
investigativo pa verifiká e outentisidat di pasaportenan, visanan, i otro dokumentonan
nesesario pa biahe. Esaki ta inkluí kontrol di e karakterístikanan físiko di e dokumento,
komo e hologramnan, e watermarknan, i e tinta di e inkt, pero tambe un komparashon ku e
databasenan internashonal pa verifiká informashon di biahe.
Pa hende ku ta biaha, e fasidesk ta duna mas seguridat, segurando ku e personanan ku ta
yega na nos isla ta uzando dokumentonan legítimo. Pa e outoridatnan di imigrashon, e
fasidesk ta duna un hèrmènt balioso pa prevení i detektá intento di biahe ilegal, ku ta yuda
na protehé nos frontera i mantené e seguridat nashonal.
Ademas, e fasidesk ta sirbi komo un punto di kolaborashon entre diferente outoridatnan,
inkluí polis, douane, i organisashon internashonal, pa sigurá ku e esfuersonan ta koordiná i
efektivo. Den e manera aki, nos ta yuda na prevení i eliminá trafikashon di hende i otro
forma di krímen ku ta usa dokumentonan falsifiká. Ta pendiente pa den 2025 Kòrsou manda
un persona ku lo partisipá na e kurso di DOC 3 na Ulanda, pa dje forma ei nos mes tin nos
eksperto lokal.