GOBIÈRNU TA MANTENÉ KU E LO GARANTISÁ E DERECHINAN DI E ASEGURADONAN DI ENNIA
Willemstad – Dia 11 di aprel último, despues di a negoshá pa kasi un aña riba un akuerdo pa reskate di ENNIA, gobièrnunan di Kòrsou i Sint Maarten, huntu ku Banko Sentral di Kòrsou i Sint Maarten, a firma un akuerdo pa resolushon di e krísis rondó di ENNIA. Esei tabata i ta nesesario pa evitá un kolèps di nos sistema finansiero i tambe e impakto sosial ku esaki lo tin, komo ku un bankarota di ENNIA lo afektá 25 mil asegurado na Kòrsou.
Entretantu un gobièrnu nobo a sinta na Sint Maarten i a duna di konosé ku e tin un otro bista riba e akuerdo. Esaki inmediatamente a resultá den diferente publikashonnan den media lokal i na Sint Maarten ku a trese duda riba e implementashon di e akuerdo di reskate ku a keda firma dia 11 aprel 2024, kual indudablemente a kousa algun intrankilidat bou di e aseguradonan di ENNIA aki na Kòrsou.
Sinembargo, Promé Minister sr. Pisas i Minister di finansa sr. Silvania ta duna e aseguradonan di ENNIA i pueblo di Kòrsou e siguransa ku gobièrnu ta mantené su palabra i disposishon pa garantisá e derechinan di e aseguradonan di ENNIA, segun e palabrashonnan hasi den e akuerdo di 11 aprel último.
Entretantu gobièrnu ta den estrecho deliberashon ku Banko Sentral pa determiná e siguiente pasonan pa evitá kalke impakto negativo riba e derechinan di e aseguradonan di Kòrsou.
Gobièrnu ta spera ku gobièrnu di Sint Maarten lo sigui mira e importansia di e akuerdo aki ku ta garantisá e derechinan di e aseguradonan di Sint Maarten tambe. Riba término kòrtiku Gobièrnu lo anunsiá kiko ta e konklushon final di e deliberashonnan andando.