PROMÉ MINISTER SR. GILMAR PISAS ta enfatisÁ ku e miembresia asosiÁ di caricom lo ta finansieramente balioso pa Kòrsou

 

PROMÉ MINISTER SR. GILMAR PISAS ta enfatisÁ ku e miembresia asosiÁ di caricom lo ta finansieramente balioso pa Kòrsou

 

Willemstad – Despues ku Gobièrnu di Reino Hulandes a aprobá e tratado ku Gobièrnu di Kòrsou a negoshá ku CARICOM, dia 28 di yüli Promé Minister Gilmar Pisas a firmá e tratado pa atmishon di Kòrsou komo miembro asosiá di “CARICOM”.

Manera indiká anteriormente dor di Promé Minister sr. Pisas, e miembresia aki ta un logro grandi pa Kòrsou, pasombra komo miembro asosiá di CARICOM Kòrsou lo tin benefisionan riba diferente tereno kaminda tin un interes komun ku e otro paisnan den Karibe.

 

Kontrali na e impreshon robes ku ta ser krea entre otro dor di e Asosiashon di Fabrikantenan di Kòrsou (Curaçao Manufacturers Association – CMA) den medionan di komunikashon, CARICOM no ta konsentrá solamente riba e tópiko di komersio i tampoko no tin ningun menasa pa fábrikanan lokal!

Esaki ta informashon kompletamente robes ku (atrobe) ta krea pániko innesesario den komunidat.

Na promé lugá, di akuerdo ku e tratado di Chaguaramas ku a funda CARICOM, miembronan di CARICOM ta koperá ku otro riba diferente tereno, manera entre otro: kordinashon di polítíka eksterior pa ku region di Karibe, kreashon di empleo pa i desaroyo humano i sosial di habitantenan den e teritorio di CARICOM, siguridat regional (esta kombatimentu di kriminalidat organisá i terorismo den region) i tambe integrashon ekonómiko.

 

Na di dos lugá, komo miembro asosiá, Kòrsou no tin ningun obligashon di forma un merkado komun i kompletamente liber di impuesto di importashon riba tur produkto ku e paisnan miembronan di CARICOM.

Pero kaminda tin bentaha, semper por skohe pa sera tratadonan komersial bilateral ku miembronan individual di CARICOM.

Esaki semper ta nifiká un ampliashon di e merkado pa nos eksportadónan, pero tambe un kanal mas pa haña mihó preis pa produktonan manera di agrikultura ku generalmente ta na un preis ta mas abou kompará ku importashon for di Merka i Europa.

Den e kuadro aki, resientemente Kòrsou a ekspandé e paisnan for di kua nos por importá karni den region, pa asina garantisá un mihó preis pa konsumidónan lokal.

Mirando e benefisionan menshoná ariba, ya kaba Kòrsou a kuminsá negosiashonnan ku diferente miembro di CARICOM, manera Repúblika Dominikana, Repúblika di Trinidad i Tobago i dentro di poko Repúblika di Sürnam, pa den futuro realisá akuerdonan komersial ku e paisnan aki, pa asina amplia nos merkado i fasilitá preisnan mas abou pa pueblo di Kòrsou, espesialmente den área di kuminda.

E tratadonan aki naturalmente ta a base di resiprosidat den regulashon: loke ta konta pa e pais en kuestion, lo konta pa Kòrsou tambe.

Semper gobièrnu lo garantisá un balansa entre e derechinan di importadó i eksportadó, basa riba leinan vigente den nos pais.

Segun e régimen pa komersio internashonal di Kòrsou, nos leinan tin sufisiente instrumento i tambe un institushon ofisial di gobièrnu (Fair Trade Authority Curaçao – FTAC) pa garantisá un kompetensia sano riba tur merkado di servisio i produkto, inkluso e produktonan produsí lokalmente na Kòrsou i esnan importá.

Ademas, tur tratado tin mekanismonan ankrá den nan pa ámbos partido aktua debidamente kontra kompanianan estranhero ku aktua kontra di e reglanan establesí.

 

Kontrali na loke a wòrdu trese dilanti den medionan lokal dor di e Asosiashon di Fabrikantenan di Kòrsou (CMA), Promé Minister sr. Pisas ta aploudí e aserkamentu positivo di e Asosiashon di Importadónan di Kòrsou (Belangenvereniging Curaçaose Agenturen – BVCA) ku si ta mira posibilidatnan i bentahanan ku por bini for di e asosiashon di Kòrsou den CARICOM.

Tur kos ta tuma nan tempu i Gobièrnu di Kòrsou ta di opinion ku nos mester organisá nos mes di tal manera ku tantu sektor públiko i sektor privá den su totalidat tin benefisio di e miembresia di CARICOM.

 

Finalmente, Promé Minister sr. Pisas ta trese dilanti ku nos no mester lubidá tampoko ku komersio internashonal ta enserá muchu mas ku importashon di produkto, pasobra pais Kòrsou ta sumamente interesá tambe pa kolaborashon ku otro paisnan den region riba terenonan ku gran potensial pa krea mas kupo di trabou, manera energia renovábel, formanan nobo di agrikultura, telekomunikashon, pero tambe áreanan ku nos tin mester di dje pa garantisá un desaroyo sostenibel di nos pais, manera desaroyo di nos kapital humano i alsa resiliensia di  islanan chikitu kontra kambio klimátiko.

E áreanan di maneho aki tin un potensial grandi pa nos futuro komo islanan chikitu den desaroyo (Small Island Development States – SIDS).

Den e promé enkuentro ku Promé Minister sr. Pisas tabata tin ku otro hefenan di gobièrnu di e paisnan miembro di CARICOM ya kaba tabata tin ekspreshon di interes konkreto pa traha ku Kòrsou, pasombra espesialmente nos posishon stratégiko, nos hafnan natural i nos infrastruktura pa duna servisio ku ta bon desaroyá, ta hasi posibel ku Kòrsou por sirbi komo un ‘hub’ pa komèrsio den Karibe.

Ta p’esei Promé Minister sr. Pisas ta kere ku nos no por pèrdè e oportunidat aki di hasi Kòrsou e pèrla di Karibe ku e ta meresé di ta!