CBCS lo hasi enkuesta den sektor industrial na Kòrsou Pa fortifiká análisis ekonómiko
Willemstad/Philipsburg – Centrale Bank van Curaçao en Sint Maarten (CBCS) lo kuminsá hasi
riba base regular enkuestanan den sektornan ekonómiko klave na Kòrsou, kuminsando den e
luna di ougùstùs aki. Datonan i informashon for di e sektornan ekonómiko klave aki ta yuda
fortifiká e análisis i pronóstiko di e ekonomia di Kòrsou. E enkuestanan lo inkluí preguntanan
tokante e prestashon di e kompania, e situashon ekonómiko general, i espektativa pa futuro.
E promé enkuesta pa un sektor spesífiko lo tuma lugá den e ramo di industria na Kòrsou. Dia 19 di
ougùstùs 2024, empresanan den e sektor aki lo risibí un lenk via e-mail pa un enkuesta online
ofresé na papiamentu, hulandes i ingles. E tempu aproksimá pa yena e enkuesta ta 10 minüt. E
enkuesta ta anónimo i tur informashon kolektá lo ser tratá konfidensialmente. E resultado di e
enkuesta lo keda publiká den un rapòrt na luna di òktober di aña aki.
Kada kuartal CBCS ta publiká un Boletin Ekonómiko ku ta analisá e ekonomia di Kòrsou i Sint
Maarten. Esaki ta yuda pa guia maneho monetario, fiskal i ekonómiko i evaluá nan efekto. Tambe
e por yuda negoshinan den planifikashon finansiero i desishon di invershon. CBCS tambe ta
aktualisá e perspektiva pa e ekonomianan di Kòrsou i Sint Maarten regularmente dor di entre otro
evaluá desaroyonan doméstiko i internashonal. Den e konteksto aki, e opinion di negoshinan
tokante nan resultado aktual, e situashon ekonómiko general, i nan espektativa pa futuro serkano
lo yuda fortifiká e trabou di análisis i pronóstiko ekonómiko.
CBCS ta pidi kooperashon di tur kompania den e sektor industrial na Kòrsou pa yena e enkuesta
promé ku dia 6 di sèptèmber 2024. Negoshinan den e sektor industrial ku no a risibí e e-mail pero
ke partisipá, por pidi e lenk pa e enkuesta online via research@centralbank.cw. E informashon i
eksperensia kompartí lo yuda pa por komprondé e desaroyonan i prestashon di ekonomia di
Kòrsou mas mihó.
Willemstad, 19 di ougùstùs 2024
CENTRALE BANK VAN CURAÇAO EN SINT MAARTEN
