WILLEMSTAD – Konosido kantante Stanley Clementina ta bèk ku otro bunita kompa ku un swing di balada titula ‘Bisami E Berdat’. Ku e interpretashon melódiko aki, Stanley ta trata un realidat ku tur hende por pasa aden, esta un kurason kibra. E stèm koutivante di Stanley ta korda un amor traisionero ku a kibra su kurason ku su infieldat. Banda di e bunita piesa aki, e temporada benidero ta karga ku mas bon músika, unda Stanley lo ta na Kòrsou i Boneiru pa algun presentashon.
Bisami E Berdat
Stanley ta konosí pa su piesanan unda e tema di amor prohibí of kompliká ta para sentral. Ku ‘Bisami E Berdat’ e protagonista ta den un relashon kaminda e ta sospecha ku e dama ta esun ku ta infiel i ta sklama pa libr’e foi su angustia i bise e bèrdat. Stanley a skibí e kantika aki basa riba eksperensia di diferente persona rònt di dje ku a pasa den situashonnan similar. “Nos mester atmití ku infieldat por pasa den tur relashon, sin importa ku ta hende homber of muhé, tur hende por pasa aden”, Stanley a kompartí. Den Bisami E Berdat’, e dama ta hasi yen kos sospecho, pero e kabayero no por pone su dede riba kiko ta pasando realmente i ta den duda. Stanley mes a kanta, komposita, i areglá e kantika, i huntu ku e talentoso produktor Zúrich Music, nan a produsí e piesa.
Sweet Pain i mas produkshon
Despues di a traha dies aña riba e proyekto mas personal ku Stanley a produsí, porfin e CD kompletamente na ingles ‘Sweet Pain’ a keda lansa 20 di mei ultimo. Según Stanley, ‘Sweet Pain’ berdaderamente tabata un ‘labor of love’, unda ela tuma su tempu ku kada piesa ku ta trata diferente etapa i periodo intimo di Stanley. E resultado final ta un obra maestral ku influensianan di músika ‘country’, domina pa kitara akústiko i violín.
Tambe Stanley tin mas kompa na kaminda i e ta drentando studio bèk pa enfoká riba su propio produkshonnan. Tambe Stanley a kontinuá su kolaborashon musikal ku kantante Jayh Jawson, unda ya pa algun aña e ta funkshona komo su direktor musikal. Na òktober benidero, Jay Jawson lo tin su di dos presentashon durante AFAS LIVE na Hulanda. Tambe komo direktor musikal, Stanley lo kompañá e duo popular di músika urbano antiano, Area 51, durante algun presentashon na Boneiru i Kòrsou.
Festival di Tumba
Na komienso di 2025, Stanley lo ta bèk na Kòrsou pa su di kuater partisipashon den Festival di Tumba, unda ela opta pa atrobe bai ku e banda Excellence, paso e ta rekonosé nan dedikashon i talento. E añanan anterior Stanley a marka pouta ku su interpretashonnan melódiko i diferente. Pa festival di tumba 2025, Stanley mes lo skibí i komposita su tumba, pues e antisipashon ta grandi pa mira kiko e ta bai bini ku ne.
KOMPARTI E NOTISIA AKI VIA / Share the news
Like this:
Like Loading...
Related
639114718427035"
639114718427035"
