Minister di Salubridat Públiko, Medio Ambiente i Naturalesa alaves Minister di Finansa ta anunsiá ku por tira sushi grátis temporalmente na Selikor

Minister Javier Silvania

Komunikado di prensa
Minister di Salubridat Públiko, Medio Ambiente i Naturalesa alaves Minister di Finansa ta anunsiá ku por tira sushi grátis temporalmente na Selikor
Willemstad – Djamars 3 di sèptèmber 2024, Minister di Salubridat Públiko, Medio Ambiente i Naturalesa (GMN), Javier Silvania, a anunsiá ku pueblo di Kòrsou por depositá sushi gratuitamente na Selikor durante e próksimo dos lunanan. E desishon aki a sigui despues di un suseso resientemente, kaminda shofùrnan di trùknan pisá kargá ku sushi a blòkia entrada di e transbordo di sushi na Malpais. Awe minister a informa sr Kook direktor di Selikor por eskrito di e desishon di gobiernu. Gobiernu ta konta ku Selikor su koperashon pa ehekuta e desishon aki.
Te ku 31 di òktober 2024, tantu habitantenan komo kompanianan lo por depositá sushi grátis na e transbordonan di sushi na Malpais i Koraalspecht. Konseho di Ministernan a aprobá e inisiativa aki i lo kompensá Selikor pa e pèrdidanan di entrada durante e periodo aki.
Fasilitashon di maneho di sushi
Tambe Minister a proponé pa aparte di hasi e depósito di sushi grátis pa e próksimo dos lunanan, pa Selikor amplia e orario di e transbordo di sushi pa evitá filanan largu. E sugerensianan aki tin komo meta pa hasi e proseso di depósito di sushi aún mas fásil pa komunidat.
Minister a enfatisá: “Nos ke fasilitá e proseso pa tur hende manehá nan sushi na un manera responsabel. E proyekto aki no solamente ta yuda komunidat, sino tambe ta un paso importante pa un Kòrsou mas limpi i sostenibel.”
Kolaborashon pa un Kòrsou mas limpi
Gobièrnu di Kòrsou ta komprometé su mes pa hasi Kòrsou un isla mas limpi i pa atendé e lugánan di tira sushi ilegal manera Dam Pretu. Tiramentu di sushi grátis na Selikor ta un medidá temporal pa stimulá komunidat pa manehá nan sushi na un manera korekto i pa kontribuí un isla mas limpi.
Evaluashon i futuro maneho
Na final di e dos lunanan aki, lo evaluá e proyekto den e grupo di trabou di Dam Pretu/Maneho di sushi di Kòrsou. Dependiendo di e resultado, lo prolongá e periodo, baha e tarifa pa depositá sushi na Selikor, òf tuma otro medidanan.
Gobièrnu ta hasi un yamada na komunidat pa hasi bon uzo di e oportunidat aki i huntu, yudá kontribuí na un Kòrsou mas limpi.