Minister Pisas a tuma nota di materialnan ku a yega pa projekto FAD’s
Minister Pisas a tuma nota di materialnan ku a yega pa projekto FAD’s
Willemstad – Mundialmente profeshonnan tradishonal ta bou di preshon, dor nan mester kompetí ku produktonan di prosesonan outomatisá. Esaki tambe ta konta pa nos peska tradishonal ku ta bou di preshon, kual ta forma parti di e diferente otro problemanan kontribuyendo na seguridat di alimentashon di nos pais.
Sobrepeska di nos ref di koral (i piskánan di fòndu) i tambe pèrdida di habitat dor di polushon, distrukshon di habitat, organísmonan invasivo, malesanan, etc. ta afektando nos sektor di peska i ta baha entrada di nos piskadónan. Pa kompensá e bahada den kapturanan, piskadónan a kuminsá piska rondó di tankeronan parti anochi riba piskánan migratório, prinsinpalmente buní. E peska aki tabata hopi eksitoso pero lamentablemenete pa motibu di e echo ku refineria a sera na aña 2018 e kantidat di tankeronan ku bini bishitá Kòrsou a baha drástikamente i e peska aki a kai den otro.
Un otro méthodo pa oumentá e kapturanan di piská ta uso di asina yamá “Fish Agregation Devices” (FAD’s). Kòrsou a kuminsá ekspirimentá ku FAD’s den añanan 90 di siglo pasá. Durante e último 5 aña piskadónan mes a kuminsá invertí den FAD’s i esakinan a resultá den un kresementu signifikante di e kantidat di piská ku nan saka for di laman. Lamentablemente a bini resultá ku trahamentu di FAD’s ta hopi karu i regularmente FAD’s ta bai pèrdí.
Den Programa di Gobernashon, Gobièrnu aktual a inkluí pa sostené i stimulá sektor di peska dor di pone un kantidat di FAD’s den nos laman. A konsultá un eksperto den trahamentu i piskamentu di FAD’s na Antigua i konforme su instrukshonan for di Guadeloupe a kumpra un gran kantidat di materialnan pa traha i instalá 25 FAD’s den nos laman. Meta di e projekto aki ta pa e eksperto di Antigua bini Kòrsou pa kompartí su konosimentu ku nos ekspertonan di FAD’s lokal.
Pa medio di e komunikado aki Gòbiernu ta hasi un yamada na tur piskadó ku ta interesá pa traha FAD’s i ku ta dispuesto pa duna un man pa traha e FAD’s nan, pa mèldu nan mes. Kondishon ta ku e piskadónan tin konosementu di laman i habilidat amplio pa ku piskamentu i nabegashon. Desde awor por mèldu na ofisina di Ministerio di Salubridat, Medio Ambiente i Naturalesa (GMN) na Colon. Persona di kontakto ta señor Faisal Dilrosun 432- 5865 òf via e- mail: faisal.dilrosun@gobiernu.cw.
