Apertura “LOKET DI KOMUNIDAT” na Sambil.
Maneho di Gobernashon, Planifikashon i Servisio Públiko
Apertura “LOKET DI KOMUNIDAT” na Sambil.
Publiká riba 26 Sèptèmber 2024
Willemstad – Ministerio di Maneho di Gobernashon, Planifikashon i Servisio Públiko ta inougurá “Lokèt di Komunidat” un ofisina nobo ku lokalidat na Sambil. Esaki ta un proyekto piloto ku e lema “Huntu nos tei pa sirbi ABO”.
Lokèt di Komunidat (LdK) ta un organisashon nobo di gobièrnu ku e meta di sentralisá servisionan, informashonnan i produktonan di Gobièrnu di Kòrsou. Bou di un solo dak i konsekuentemente por asistí i fasilitá nos suidadanonan. Ku esaki e kliente ta evitá di akudí na diferente lokalidat pa regla asuntunan. E lo por traha su sita ‘Online’ i bini na Sambil i risibí e yudansa nesesario di un forma lihé i efektivo. Otro posibilidat ta ku e empleado einan ta tuma su petishon huntu ku e pago di e servisio, sea online òf via swipe, i registrá via di e sistema e-CuraCase e petishon. Asina aki e departamento konserní ta prosesá su petishon i manda bèk e produkto pidí na Sambil pa entreg’é riba e dia akordá.
E proyekto piloto aki ta konsistí di departamentonan di Lokèt di Pèrmit i Asuntunan Públiko (Kranshi) ku konhuntamente ta bai bou di un dak. Debí ku ta trata di un proyekto piloto a skohe pa brinda solamente algun produkto di e dos organisashonnan aki.
Entrante djaweps 3 di òktober próksimo, por bishitá “Lokèt di Komunidat” pa informashon i por entregá petishon pa entre otro:
- Ekstraktonan (uittreksels) di Kranshi,
- Deklarashon di Bon Kondukta,
- Pèrmit pa Puesto Fiho (Standplaatsvergunning) i Puesto Ambulante (Ventvergunning).
Lokèt di Komunidat lo ta situá na Unit L-21 na Sambil (entrada Cas Abou)
Orario: djaluna pa djaweps 09:00 – 16:00 or
djabièrnè 09:00 – 12:00 or
E-mail: ldk@gobiernu.cw
Lokèt Digital: https://loketdigital.gobiernu.cw
Gobièrnu di Kòrsou ta sigui esforsá pa mehorá su servisionan na nos komunidat.
“Servisio di Kalidat na 1 Lokalidat”.

