Después di golpi ekonómiko di pandemia situashon pabou ketu bai ignora Banda bòu den Krisis: E Herida Invisibel di Pobresa i Negligensia

Después di golpi ekonómiko di pandemia situashon pabou ketu bai ignora
Banda bòu den Krisis: E Herida Invisibel di Pobresa i Negligensia

Un Desafio Serio pa Seguridat i Bienestar Laboral.

Mientras ku resto di Kòrsou ta rekonstruí poko poko di e golpi ekonómiko, e región nan más pober di e país ta keda alarmantemente komo sifuera nan no ta pertenesé na responsabilidat di presupuesto di país. Kolaborador i Sekretaria di Trabou pa Kòrsou TPK,
señora Abigaïl Mahalja Boelijn, ta siguí studia e sifranan riba wepsait di CBS i ta di opinión ku e gobièrnu aktual ta ignora nesesidatnan di e komunidat di Banda bòu, ku resultádo di más aumènto di pobresa, desempleo i falta di fasilidat nan básiko. Ta tempu pa duna e komunidat di Banda bòu ku parse lubidá, su atenshon i yudansa di ún forma más urgente. Sifranan di resultado resientemente di CBS ta mustra ku 31% di e hendenan na Kòrsou ta biba bòu di e liña di pobresa, mayoría di e hendenan ta biba den e área rústiko di Banda bòu. Mas o menos 16.872 kas di famia ta biba bòu di e rant di pobresa, afektando ún totalidat di 46.647 persona riba nos país. Apesar di e sifranan alarmante aki, ún plan struktural di sosten no tin, miéntras ku e pobresa ta siguí kresé más i más. Trabou pa Kòrsou tábata den e barionan di Soto i Barber dos siman pasá hasiendo enkuesta ku siudadanonan di Banda bòu i a konstatá problemanan prinsipal den e distrikto di Banda bòu. E nivel di desempleo na Banda bòu ta hopi haltu, espesialmente bòu di hobennan i hendenan ku no a haña masha enseñansa/ skol. Nan ta dependé hopi di trabòu nan di tempu kòrtiku di e sektor turistiko. Fuera di esaki, aksesibilidat na awa di bebe i kuido di salú ta limitá pa hopi kas di famian na Banda bòu. Hopi di e fasilidat nan básiko aki no ta di e nivel ku ta garantisá ún bida digno. Gobièrnu a tumá sierto medidanan, manera yuda ku paki di kuminda den tempu difísil, pero no tin ún plan di largu tempu pa rekonstruí e área di Banda bòu, ni den trabòu o infrastruktura. I edukashon tin falta di struktura i invershon, pa e komunidat ku ya ta sinti ku nan ta wòrdu ignora.

E negligensia pa e komunidat di Banda bòu tin un gran impakto, no solamente ku material, tambe emoshonal i psikológiko. Hoben nan di Banda bòu ta sinti hopi falta di speransa, i oportunidat nan bèrdadero, miéntras tantu kriminalidat i otro problemanan sosial ta keda un reto grandi pa e hobennan aki. Famia nan ta lucha pa sobrebibí di ún dia pa otro, sin speransa pa ún mihó futuro. Tin persona nan ku ta dependé di un penshun chikí, o riba penshun di nan mayor nan. Hobennan ta den búskeda di trabòu, pero no tin sufisiente posibilidat. E situashon ta insostenibel. Ta ora pa e gobièrnu tuma medidanan konkréto pa sostené e komunidat di
Banda bòu. Mester tin invershon den e hende di Banda bòu, den trabòu pa e hende di Banda bòu, infrastruktura i skol pa kompletá e nesesidatnan di e área di Banda bòu. Ta ora pa Ministerio di SOAW (Desaroyo Sosial, Labor i Bienestar) i sigur e Promé Minister, ku netamente e mes ku ta bini di e bario nan aki, pa komprendé kiko e komunidat di Banda bòu tin mester di djé.
Stadion di deporte i kaminda nan asfaltá ta positivo, pero e problemanan sosial ta mas profundo ku esakinan. Mester por kibra ku e sirkulo di pobresa mas pronto posibel.
E èks Minister di SOAW a bisa ku ela bai laga plannan pa traha kla kabá, ta ehekutá mester ehekutá e trabòunan awor. Kiermen esun ku bin sinta riba e funshon aki, lo haña trabòunan kla pa kuminsa trahá fásil den e sobrá 5 luna nan ku a keda promé ku elekshon. E hende di Banda bòu meresé ún trato mas hustu.

Prensa tambe mester yuda pa tresé e realidad na klaridad di dia, pa asina e otro partinan di país Kòrsou ku tin n’e un tiki mas mihó por mira ku Banda bòu tambe ta parti di Kòrsou. Nos di Trabou pa Kòrsou ta yama e gobièrnu i komunidat pa traha huntu i saka man pa asina nos por saka e komunidat nan di Banda bòu for di e krisis i evitá ku nan siguí wòrdu lubidá i famianan siguí kibra pa motibunan di pobresa i desaroyonan sosial insostenibel.