Konkurso di investigashon ekonómiko pa studiante di skol sekundario i universidat CBCS Best Economic Research Award 2025
WILLEMSTAD/PHILIPSBURG — Centrale Bank van Curaçao en Sint Maarten (CBCS) ta anunsiá
lansamentu di e di sinku edishon di Best Economic Research Award (BERA) pa studiante. E
studiantenan ku ta den nan último aña di HAVO òf VWO na Kòrsou i Sint Maarten ta keda invitá pa
entregá un ‘profielwerkstuk’ di ekonomia riba un tópiko relevante pa e ekonomianan di e union
monetario. Fuera di esei, e studiantenan na nivel di bachelor i master ku a skirbi un tésis relashoná
ku ekonomia di isla chikitu entre 2023 i 2025 tambe por entregá esaki. Tur ganadó lo risibí un
premio atraktivo i e respektivo skol(nan) di e ganadónan na nivel di HAVO i VWO tambe lo risibí
un premio.
E meta prinsipal di premio BERA ta di stimulá investigashon ekonómiko bou di studiante na Kòrsou i
Sint Maarten, ku enfoke spesialmente riba ekonomia di isla chikitu. Fuera di esei, CBCS ta spera ku e
programa akí lo sirbi pa inspirá e studiantenan di HAVO/VWO pa sigui un estudio riba tereno di
ekonomia. ‘Durante e último añanan nos a ripará un oumento kontinuo den e kantidat di studiante i
skol ku ta partisipá, i un oumento supstansial den kalidat di e trabounan entregá. E tópikonan di
investigashon ku nos a risibí aña pasá tabata sumamente interesante i ta indiká ku e studiantenan ta
konsiente di e tendensianan ekonómiko aktual, i entusiasmá pa investigá i analisá esakinan,’ segun
Direktor Ehekutivo di CBCS, dr. José Jardim.
Na nivel di HAVO i VWO, kada proyekto ganadó di e konkurso lo risibí un premio di Cg. 2.500 i un
trofeo, miéntras ku e skol ganadó den kada kategoria lo risibí un premio di Cg. 5.000 i un trofeo. Na
nivel di bachelor, e ganadó lo risibí un premio di Cg. 5.000 i na nivel di master, Cg. 7.500. Ademas, lo
otorgá un trofeo na ámbos ganadó. Ta bon pa menshoná ku na nivel di bachelor i master, e
kompetensia ta habrí tantu pa studiante na e universidatnan di Kòrsou i Sint Maarten komo di eksterior.
Pronto, tur skol HAVO i VWO na Kòrsou i Sint Maarten lo risibí un invitashon ofisial pa partisipá na
BERA. Tambe, nan por pidi un seshon di informashon tokante e konkurso, ku personal di CBCS lo
presentá na nan skol mes. Na Kòrsou, e seshonnan informativo lo tuma lugá den e simannan benidero
i esunnan na Sint Maarten ta planiá pa kuminsamentu di desèmber. Meta di e seshonnan akí ta di lanta
interes i gana di e studiantenan pa partisipá. Den e promé kuartal di 2025, algun representante di CBCS
lo ta di bishita na e universidatnan na Kòrsou i Sint Maarten pa ofresé e studiantenan ku ta graduando
informashon tokante e konkurso.
Mas informashon tokante e kondishonnan pa partisipá, e reglanan di e konkurso i e kriterionan di
evaluashon ta disponibel na http://www.centralbank.cw/education/best-paper-award.
Willemstad, 18 di òktober 2024
CENTRALE BANK VAN CURAÇAO EN SINT MAARTEN
