KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNU

Proyekto ‘mehorashon bibienda partikular’ aprobá

Proyekto ‘mehorashon bibienda partikular’ aprobá

Ta bai hasi uso di un suma total di mas ku 3.9 mion euro pa Boneiru, pa restrukturashon di e stòk di bibienda partikular.

Na kuminsamentu di luna di aprel di aña 2024 Kolegio Ehekutivo a hasi un petishon na  ministerio di Asuntunan Interno i Relashonnan den Reino pa hasi e Fondo di Bibienda Públiko aksesibel pa Boneiru tambe (i pa e otro islanan BES). E minister a reakshoná positivamente riba e karta akí i a disidí pa pone medionan disponibel for di e Fondo di Bibienda Públiko pa islanan BES. Ta bai hasi uso di un suma total di mas ku 3.9 mion euro pa Boneiru, pa restrukturashon di e stòk di bibienda partikular pa mehorashon di habitabilidat i siguridat.

E Fondo di Bibienda Públiko ta enfoká riba restrukturashon di bibienda públiko, kaminda ta trata di aktividatnan manera mehorashon di bibienda, demolishon i konstrukshon nobo, i transformashon. Den kaso di transformashon por hasi uso di un parti di e medionan tambe pa aktividat den espasio públiko òf fasilidat sosial. E proyekto ‘Mehorashon di Bibienda Partikular’ ta enfoká prinsipalmente riba mehorashon di bibienda den e tres barionan tradishonal di Boneiru: Rincon, Nort’i Saliña i Antriol. Den e barionan akí habitabilidat ta bou di preshon debí na entre otro oumento di pobresa, falta di mantenshon (regular) na e bibiendanan ku ta den poseshon partikular, embehesimento, infrastruktura defisiente i kasnan di famia ku ta konsistí di diferente generashon.

Den e barionan akí tin bibienda partikular ku hopi biaha ta den estado sumamente malu i insigur, ku defisiensianan grave manera dak ku ta lèk, bentana kibrá, porta ku no t’ei, kushina  ku no ta seif i fasilidat sanitario inadekuá. Pa gruponan vulnerabel (hende ku tiki rekurso i hende ku limitashon) e situashon ta èkstra agudo, pa motibu ku nan mobilidat limitá i nan nesesidatnan spesífiko ta pidi pa sirkunstansianan adaptá pa biba, ku nan mes no por realisá.

E proyekto ‘Mehorashon di Bibienda Partikular’ ta enfoká pues riba mehorashon di e sirkunstansianan di bida di e gruponan vulnerabel akí, di manera ku esaki ta oumentá nan siguridat, nan abilidat pa yuda nan mes, i ta mehorá kalidat di e bario kaminda nan ta biba. E trabounan ta enserá entre otro drechamentu di loke ta defisiente na e bibiendanan, mehorashon di fasilidat i realisashon di e adaptashonnan nesesario, manera entrada i kaminda di kana ku ta aksesibel pa ròlstul, i ponementu di baño i tualèt adaptá den e bibiendanan. Lo mehorá e espasio públiko direkto rònt di e bibiendanan tambe.

‘Ku uso di e medionan for di e Fondo di Bibienda Públiko, den un periodo di kuater aña finalmente nos por adaptá i mehorá mas bibienda partikular den un forma drástiko. Den kombinashon ku e fondonan di 2,1 mion ku anteriormente a keda otorgá di e Dil di Patrimonio, esaki ta brinda un bon base pa por atendé den un forma efektivo i struktural ku nos patrimonio. Esaki sigur ta nesesario i importante, i e lo tin un impakto positivo grandi riba sirkunstansianan di biba i kalidat di bida di nos hendenan, i prinsipalmente e gruponan vulnerabel den e diferente barionan na Boneiru’, segun diputado Anjelica Cicilia tokante e medionan ku a otorgá na Boneiru for di e Fondo di Bibienda Públiko.

639114718427035"
639114718427035"