Servisio di Salubridat Públiko di Ministerio di GMN tin atenshon pa molèster di sangura den área di Piskadera
Servisio di Salubridat Públiko di Ministerio di GMN tin atenshon pa molèster di sangura den área di Piskadera
Willemstad – Ministero di Salubridat, Medio Ambiente i Naturalesa ta partisipá ku su servisio di Salubridat Públiko (ántes GGD) tin atenshon pa e situashon di hopi molèster di sangura pa habitantenan di área di Piskadera i Charo. Kolaboradónan di THZ (Technische Hygiënische Zorg) ya a bishitá e sitionan kaminda probablemente e foko di e sanguranan ta i ta hasiendo ehersisionan pa atendé ku e situashon.
Pa awe entre 5’ or di atardi i 8’ or di anochi servisio di THZ lo flit den área di Piskadera i Charo. Ta konsehá habitantenan pa momentu ku e vehíkulo di flit pasa den nan kaya pa sera bentana i portanan di kas. Habitantenan ku ta kria para mester tapa e kouchi òf pone esakinan paden. Tambe lo hasi uzo di BTI kual ta un produkto orgániko spesial pa tira den awa kaminda tin foko di sangura pa eliminá e larvanan. Ministerio di GMN ta pidi habitantenan di Piskadera i Charo dikulpá pa kualkier inkumbiniensha ku e trabounan di kombati sangura por trese kuné.
