Kaso di Hit & Run a tuma lugá riba Kaya Nikiboko Nort
Den oranan di márduga di djasabra 9 di novèmber, alrededor di 2.15 or, un kaso di Hit & Run a tuma lugá riba Kaya Nikiboko Nort. Un outo koló shinishi ku tabata bayendo den direkshon di Amboina a kore dal den un outo ku tabata stashoná, pa despues siguí kore i dal den un peaton i siguí kore bai. Ambulans a transportá e víktima pa hospital pa tratamentu médiko.
Polis ta hasi un yamada na un i tur ku por a mira of sa algu tokante e kaso di hit & run aki, pa tuma kontakto ku polis via 715 8000 òf via di e number di tep anónimo 9310.