Resolushon ENNIA ta sigui avansá
Resolushon ENNIA ta sigui avansá
WILLEMSTAD/PHILIPSBURG – Resientemente, Centrale Bank van Curaçao en Sint Maarten
(CBCS), den bon kolaborashon ku gobièrnu di Kòrsou i di Sint Maarten, i na interes di e
aseguradonan i demas kreditornan, a dal vários paso importante den kuadro di resolushon di
Grupo ENNIA (Resolushon ENNIA). Despues ku dia 11 di aprel 2024, CBCS, gobièrnu di Kòrsou
i gobièrnu di Sint Maarten a firma un asina yamá ‘hoofdlijnenakkoord’ pa Resolushon ENNIA
(e Hoofdlijnenakkoord), dia 9 di òktober, e partidonan menshoná a yega na akuerdo riba un
addendum na e Hoofdlijnenakkoord. E addendum akí ta kontené palabrashon adishonal pa
elaborá riba sierto aspekto di e Resolushon ENNIA, pero sin mishi ku e puntonan di salida di
Resolushon ENNIA fihá anteriormente den e Hoofdlijnenakkoord. Punto di salida ta, i ta keda,
ku lo no redusí loke e aseguradona di ENNIA tin derecho riba dje.
Resolushon ENNIA lo enserá un restrukturashon di Grupo ENNIA. E restrukturashon akí ta posibel
a base di e areglo di emergensia ku ta na vigor pa Grupo ENNIA, diktá pa Korte di Promé Instansia
di Kòrsou dia 4 di yüli 2018. Pa mas klaridat, aki ta sigui un splikashon di e dos aspektonan prinsipal
di e restrukturashon i algun otro kambio nesesario den struktura i operashon di Grupo ENNIA:
(1) Lo lanta un grupo nobo di seguro ENNIA i transferí parti di e obligashonnan di seguro
Den kuadro di e restrukturashon, tin bastante preparativo ku mester tuma lugá den e simannan
benidero pa e grupo nobo di kompania di seguro ENNIA por kuminsá operá dia 1 di yanüari 2025.
Un entidat nobo, ENNIA Holding N.V., lo enkabesá e grupo nobo di kompania di seguro
ENNIA. ENNIA Holding N.V. lo ta akshonista di e entidat nobo ENNIA Leven N.V. i e kompanianan
eksistente ENNIA Caribe Schade N.V. i ENNIA Caribe Zorg N.V. (tur huntu, di awor padilanti: ENNIA
(nobo)).
E kompania aktual ENNIA Caribe Leven N.V. lo keda bou di e areglo di emergensia. Parti di su
obligashonnan di seguro lo pasa pa e entidat nobo ENNIA Leven N.V. E parti di e portafolio (e
obligashonnan) di seguro ku lo keda transferí lo konsistí di e obligashonnan akumulá a base di loke
e aseguradonan paga na prima for di 4 di yüli 2018 padilanti (dia ku e areglo di emergensia a drenta
na vigor). Na mes momento, e aktivonan (invershonnan) ku, pa lei, ta respaldá e obligashonnan
transferí tambe lo pasa pa ENNIA Leven N.V. Ademas, e grupo ENNIA nobo lo disponé di un
struktura di propiedat i finansiamentu duradero.
(2) Atministrashon di e obligashonnan di seguro restante
ENNIA Caribe Leven N.V. lo keda ku e obligashonnan di seguro akumulá na fabor di e
aseguradonan a base di e primanan ku nan a paga promé ku Korte a dikta e areglo di emergensia
(dia 4 di yüli 2018). En prinsipio, ENNIA Caribe Leven N.V. lo kumpli kompletamente ku e
obligashonnan akí ku e tin ku e aseguradonan.
Pa hasi esei posibel, lo mester parti algun di e pólisanan na dos. Esei ta debí ku, konforme e
Hoofdlijnenakkoord, ENNIA Caribe Leven N.V. lo kaba di kumpli ku un parti di e portafolio aktual di
pólisa di seguro miéntras ku, manera a ser spliká bou di punto 1, e otro parti lo sigui bou di un
entidat nobo (ENNIA Leven N.V.). Ku e solushon akí, lo no ta nesesario pa redusí loke e
aseguradonan tin derecho riba dje. Korte den Promé Instansia na Kòrsou a duna CBCS un
outorisashon spesial a base di Landsverordening Toezicht Verzekeringsbedrijf pa parti pólisanan di
e manera akí. Den e Preguntanan frekuente tokante ENNIA,1 por lesa kiko eksaktamente e
partimentu di pólisa ta enserá.
Banda di e dos kambionan di struktura menshoná, tin mas kambio ku lo tuma lugá den e periodo
benidero i vários opshon stratégiko ku ta siendo analisá. Esunnan prinsipal ta lo siguiente:
• Pa ENNIA (nobo) por desaroyá su aktividatnan di seguro, ENNIA Caribe Holding N.V. lo
transferí parti di su aktivonan operashonal tambe pa ENNIA (nobo), entre otro e sistemanan
di informashon.
• E akuerdonan di trabou aktual di personal di ENNIA Caribe Holding N.V. lo terminá i ya ta
invitando tur empleado pa solisitá pa un funshon na ENNIA (nobo).
• Pa evitá konfushon entre ENNIA (bieu) i ENNIA (nobo), lo kambia nòmber statutario di
ENNIA Caribe Holding N.V. i ENNIA Caribe Leven N.V.
• Den kolaborashon ku e diferente instansianan enbolbí, e entidatnan supervisor i e dos
gobièrnunan, CBCS lo studia vários otro opshon stratégiko pa e kompanianan di ENNIA na
Aruba i pa e tereno di Mullet Bay na Sint Maarten, i lo tuma e akshonnan nesesario.
Tambe, tin ku menshoná ku e restrukturashon akí no tin ningun konsekuensia pa e demandanan
ku ta andando kontra Parman International, akshonista di ENNIA, i Sr. Ansary i otronan. CBCS i
ENNIA (bieu) ta, i ta keda, komprometí pa kobra Parman International (i Ansary i otronan) daño i
perhuisio.
Por último, CBCS lo sigui tene tur stakeholder mas tantu posibel na altura tokante avanse i
implementashon di e proseso di restrukturashon di Grupo ENNIA.
Willemstad, 8 di novèmber 2024
CENTRALE BANK VAN CURAÇAO EN SINT MAARTEN
