UN BOS DI DJAMANTA A DESPEDÍ

 

UN BOS DI DJAMANTA A DESPEDÍ

 

Direktiva di AMAK a risibí e notisia tristu ku E “dama de la canción”, e bos di Djamanta di Kòrsou Sra. Mafalda Salsbach Minguel ya no ta huntu ku nos mas.

 

Tumando na kuenta, ku e aña aki, den dianan di Bandera, e gran dama aki a interpretá algun número ku bos vibrante, pa deiletá tantu esnan ku tabata presente komo esnan ku a sigui e transmishon via di kanalnan di televishon.

 

Mafalda tabata un gran kantante ku un bos úniko ku tabata interpretá tur género di músika, espeshalmente e son cubano, e salsa, e tumba i bolero ku balada na un forma úniko.

 

Mafalda su karera musikal ta konosí, kaminda na edat hóben di 16 aña ela kuminsa kanta ku Trio pa durante añanan largu forma parti di  e orkestanan di Famia Salsbach ku  ta Conjunto San Jose, La Nueva Generacion i ultimo añanan aki Arnell i su Orkesta.

 

Mafalda a yega di presentá den gran forma durante diferente Festivalnan manera Festival di Tumba.

 

Mafalda sigur ta bai laga atrás un bashí enorme, pero e por ta orguyoso di ta mama di yunan talentoso ku ta militando den farándula den gran forma. Mafalda por a eksperensiá tambe un bunita kanshon di mama ku su yu hombre Carlos Salsbach a dediká su pèrsona pa dia di mama.

 

Farándula ta di luto. Físikamente Mafalda lo no ta ku nos mas, pero su tremendo bos lo sigui resoná mediante di e kansionnan ku ela graba durante su karera musikal.

 

Direktiva di AMAK ta pidi tur músikonan i artistanan ku ta posibel pa bai tuma despedida di Sra Mafalda djabierne 27 di desèmber na El Tributo.

 

Forsa na famia Salsbach i na farandula kompletu i ku su alma sosegá na pas.