AWOR SI DIPUTADO ABRAHAM A BRUA MES MES…
AWOR SI DIPUTADO ABRAHAM A BRUA MES MES…
Kralendijk 16-01-2025 – Ora Diputado Abraham ta papia, e ta papia asina tantu kos robes pa
drech’i, ku e mes ta kuminsa kere su mes. E motibu ku e ta kere su mes ta pasobra e ta pensa ku
ningun hende mas na Boneiru no ta dispone di informashonnan korekto. Ta esaki a pasa e siman aki
na momenentu ku Diputado Abraham tabata papia tokante di Kompanianan di Gobiernu. Segun
Diputado Abraham kompanianan ku ta kai bou di Bonaire Holding Maatschappij, esta BHM, ta bai
malu anto e kompanianan ku ta kai direkto bou di Gobiernu ta bai bon.
Na prome luga e kompanianan ku ta kai bou di Gobiernu direktamente ku ta WEB N.V., BIA N.V. i e
OTB, tur ta kompanianan ku a wordu salba dor di Hulanda. E mesun Hulanda ku Diputado
Abraham ta bringando ku ne dilanti Hues. Diputado Abraham ta bringando ku Hulanda dilanti di
Hues pasobra e no kier Hulanda interveni i salba situashon di sushi i Selibon N.V. Mientras e mesun
Diputado ta sali bisa den i bisa ku e uniko kompanianan di Gobiernu ku ta bai bon na Boneiru ta
netamente e tres kompanianan ku Hulanda a skapa di bai fayisimentu. Diputado no tin ningun idea
di kiko e ta papia. Representante di Reino, señor Helmond mester sali afo i rekorda Diputado
Abraham ku ta Hulanda a hinka miyones den por ehempel WEB N.V., si no awe nos no tabatin WEB
N.V.
Ta obvio ku Diputado Abraham a kuminsa un gera kontra di BHM. Mi kier a rekorda Diputado
Abraham ku BHM a wordu krea dor di Partido Democrat. E motibu pakiko durante di hopi aña otro
partidonan a bringa BHM tabata netamente pasobra ta Partido Democrat a krea BHM pa motibunan
politiko. Ta pesei mi ta bolbe ripiti, Diputado Abraham no sa kiko e ta papia. Laga e bai den arkivo
di Gobiernu i e tira un bista riba kua diputado a krea BHM i tabata Komisario den BHM. Tin hopi
mas di konta riba kiko BHM ta nifika pa Partido Democrat pa por a gana elekshon, pa awor aki laga
mi djis nombra Sporthal i Kolegio Kristo Bon Wardador. Mi ta rekomenda Diputado Abraham pa e
bai hasi su “huiswerk” prome e sigui brua sum es mas tantu ainda.
James Kroon.
