Minister Presidènt Pisas ta risibí bishita di pastornan for di Estados Unidos ku lo organisá un anochi di fe i speransa djasabra awor na Brionplein

Prome Minister Gilmar Pik Pisas

Minister Presidènt Pisas ta risibí bishita di pastornan for di Estados Unidos ku lo organisá un anochi di fe i speransa djasabra awor na Brionplein

Willemstad – Resientemente Minister Presidènt señor Gilmar Pisas a risibí un grupo di pastornan renombrá for di Estados Unidos, ku a uni huntu bou di e nòmber Comunidat Cristiana Restauraciones a las Naciones, pa evangelisá e palabra di Dios na nashonnan. E motibu di e bishita ta pa informá Minister Presidènt di e mishon di nan bishita na Kòrsou. Durante e enkuentro aki nan a papia tokante diferente tópikonan religioso i e aktividat evangéliko ku nan lo realisá na Brionplein. E aktividat aki ku e tema “Resiliensia” tin komo meta pa inspirá e komunidat di Kòrsou pa medio di e historia impreshonante di e bida di Evangelista Carlos Evans.
Carlos Evans ta un èks- marinero ku rumbo di su bida a kambia pa semper despues ku ela trapa riba un bom ku a eksplotá. A konsekuensia di e suseso trágiko aki ela pèrdè ámbos pia i un man. Sin embargo, na lugá di lamentá, el a skohé pa transformá su dolor den forsa i su historia den un testimonio di fè i balentia.
E historia di Evangelista Carlos Evans pues ta un inspirashon ku ta mustra ku resiliensia por duna balor i speransa den kualkier situashon.
E evento evangéliko aki lo tuma lugá djasabra awor, 18 di yanüari, pa 7:30 di anochi na Brionplein. Tur hende ta invitá pa partisipá na un anochi di fe i speransa. Pastornan ku lo ta presente ta: Rafael Evans, Carlos Evans, Raul Feliciano, Emma Matos Feliciano i Clemencio Rodriguez.