Ministerio di Hustisia ta lansa kampaña di prevenshon WÒKI TÒKI, Minister Shalten Hato ku meta pa konsientisá spesialmente nos hóbennan
Ministerio di Hustisia ta lansa kampaña di prevenshon WÒKI TÒKI, Minister Shalten Hato ku meta pa konsientisá spesialmente nos hóbennan
WILLEMSTAD, 20 di yanüari 2025 – Ministerio di Hustisia, enkabesá pa Minister Shalten
Hato, ku orguyo ta lansa e kampaña di prevenshon yamá WÒKI TÒKI. Meta prinsipal di
WÒKI TÒKI ta pa informá i konsientisá komunidat tokante prevenshon for di diferente
ángulo. Den estrecho koperashon ku diferente organisashon ku ta forma parti di Ministerio
di Hustisia a yega na e kontenido. E kampaña di prevenshon ta ilustrá reto òf situashonnan
di bida ku diariamente por sosodé. Minister Hato ta enfoká pa konsientisá i informá pueblo
en general pero spesialmente nos hóbennan pa tuma desishon responsabel.
Awor, dikon WÒKI TÒKI? Nos tur konosé e aparato den kua, entre otro, agentenan polisial ta
komuniká ku otro. Ora tin kualke insidente òf kalamidat e WÒKI TÒKI ta hunga un ròl sentral
den konektá esnan enbolbí ku otro. Ta un aparato ku bo por tene den bo man, primi i
komuniká entre kolega i entre organisashonnan hudisial. Simbólikamente e WÒKI TÒKI ta
nifiká komunikashon kla, direkto i inmediato. Pues e WÒKI TÒKI ta simbolisá komunikashon
habrí ku nos komunidat pa yega na mas konsientisashon. Alabes por mira e WÒKI TÒKI komo
un medio ku ta fasilitá trabou den tim pa atendé ku kualke kaso di emergensia òf pa prevení
kualke situashon ku no ta deseabel.
E kampaña di prevenshon WÒKI TÒKI ta bai yega na siudadanonan di Kòrsou di tur edat via
di diferente medio di komunikashon i aktividat. Durante aña ta bai organisá vários aktividat
den kuadro di prevenshon. Ya kaba por a mira e promé paso ku ta e trailer di e pelíkula WÒKI
TÒKI. Un konsepto inovativo pa yega na kapta atenshon di komunidat. E pelíkula ta trese
huntu e ekspertisio preventivo for di brel di organisashonnan den Ministerio di Hustisia.
Por ehèmpel, Brantwer su área di ekspertisio ta kandela pues e pelíkula ta duna tep kon bo por
tuma e desishon mas responsabel pa prevení kandela. Asina pelíkula su ophetivo ta pa
kontribuí na redukshon di krímen pa medio di mustra e konsekuensia di aktitut robes. Di e
manera aki kada persona ku hañ’é den situashonnan similar por husga pa su mes i skohe pa
evitá pa e situashon eskalá.
Minister Shalten Hato ta invitá tur siudadano di Kòrsou pa tuma tempu i disfrutá di e pelíkula
WÒKI TÒKI. Dirigí pa e hóben produktor Greyan Pastor ku un tremendo elenko di yunan di
Kòrsou dilanti i patras di kòrtina. Ku inovashon i kreatividat di nos mentenan lokal a krea e
produkshon aki pa hasi komunidat, spesialmente nos hóbennan, mas konsiente di e
konsekuensia di aktua robes. E pelíkula WÒKI TÒKI ta bai pasa grátis na diferente plataforma
pa komunidat kompletu por disfrutá di dje. Un danki spesial na kada organisashon di
Ministerio di Hustisia ku ta kontribuí na e kampaña di prevenshon WÒKI TÒKI: UOJZ,
Brantwer, KPC, TO, PATH, SDKK, JJIC i Reclassering. Ban kompartí e mensahe di prevenshon
den tur nos kasnan na Kòrsou.
