Selikor NV ta kontinuá ku e servisio pa rekohé shushi gròf grátis, un biaha pa luna den tur bario
Selikor ta kontinuá ku e servisio pa rekohé shushi gròf un biaha pa luna grátis i lo ta den tur bario kaminda habitantenan por ofresé nan shushi gròf.
E definishon i reglanan aktual pa shushi gròf ta keda vigente. Shushi gròf ta tur shushi di kas tamaño grandi ku no por drenta den kònteiner di shushi. Algun ehèmpel di shushi gròf ta entre otro: wasmashin, frishidèr, stof, kolchon, stul, mesa, televishon i radio bieu.
Pa loke ta trata shushi di kurá ta konta ku esaki no ta un servisio grátis i ku na momentu ku Selikor pasa pa servisio di shushi gròf grátis, lo no rekohé shushi di kurá. Evitá di pone bo shushi di kurá huntu ku shushi gròf, e shushi aki lo keda atras pa motibu ku e no ta kumpli ku e reglanan di shushi gròf.
Riba e skema di luna di febrüari ku Selikor a publiká, por a nota un kambio. A repartí Kòrsou den kuater zona. Pa kada zona ta indiká e wikènt ku mester saka shushi gròf pone pafó i Selikor lo pasa durante e siman. Riba e dia ku Selikor ta pasa den e bario e shushi mester ta poné na kantu di kaminda i no por tin ophetonan ku ta opstakulisá e trabou manera entre otro: outo kantu di kaminda, palu di koriente òf kabelnan kologá di internèt/koriente. Tambe no por pone e shushi riba pipanan di awa/di koriente. Si nos personal yega i konstatá un situashon ku por peligrá e trabou òf okashoná daño na propiedat, nos lo no bai ku e shushi i lo laga un notifikashon atras pa e kliente.
Un petishon speshal na tur habitante pa mantené nan mes na e reglanan stipulá pa asina Selikor por dunabo e servisio mas mihó i na bienestar di nos tur. Nos ta konta ku koperashon di komunidat kompletu pa e trabounan por kana di forma optimal.
