MAN-PIN: PARTISIPASHON DI SUIDADANO I GOBERNASHON TRANSPARENTE

MAN-PIN: PARTISIPASHON DI SUIDADANO I GOBERNASHON TRANSPARENTE
Willemstad, Kòrsou – Partido MAN-PIN ta presentá un programa polítiko inovativo den kua partisipashon di siudadano i gobernashon transparente ta sentral. MAN-PIN ta mira partisipashon komo un proseso kontinuo den kua siudadanonan por kontribuí aktivamente na gobernashon di nan pais sin miedu di represaya. E programa ta enfoká riba un sosiedat dinámiko den kua poder ta den komunidat pa bienestar komun i desaroyo duradero.
Pa logra esaki, MAN-PIN ta enfoká riba medidanan konkreto ku ta promové partisipashon aktivo di siudadano den legislashon i trahamentu di polítika, ku atenshon spesial pa gruponan marginá: Un serie di Kumbre Nashonal na komienso di e periodo di gobernashon den kua siudadanonan, ekspertonan i tur interesadonan konhuntamente ta establesé un vishon i prioridatnan kompartí pa Kòrsou, ta e fundeshi pa gobernashon transparente. Di e forma aki ta garantisá enbolbimentu direkto di siudadanonan den maneho di pais.
Tambe lo lanta pa medio di lei konsehonan di bario pa garantisá partisipashon duradero di siudadano den solushoná problemanan di bario. Gobiernu lo sòru pa sufisiente rekurso finansiero pa hasi prosesonan partisipativo aksesibel pa tur organisashon di komunidat.
Komunikashon ku pueblo ta un derechi ku tur hende riba nos Kòrsou tin. P’esei lo pone un paro na e aktitut di gobièrnu aktual di keda sin duna kuenta i rason den parlamento. Ta bin lei ku ta obligá gobièrnu pa duna kuenta na Parlamento den un plaso di tempu spesifiká, inkluyendo e publikashon di dokumentonan di maneho i tenementu di debatenan parlamentario públiko riba asuntunan klave. Lo studia e posibilidatnan konstitushonal pa mara e obligashon di mandatarionan na sanshonnan legal, e.o. pèrmit di Parlamento pa hasi gastunan ku ta pasa sierto montantenan, te ora e minister duna kuenta i rason.
Ku MAN-PIN den gobièrnu, Konseho di Minister lo tene rueda di prensa tur siman pa garantisá transparensia i informashon públiko. Huntu ku esei gobièrnu lo fortalesé su servisionan di informashon públiko i garantisá komunikashon na tempu ku siudadanonan.
Ku e proposishonnan aki, MAN-PIN ta manda un mensahe kla: Kòrsou mester di un kultura polítiko den kua bos di siudadanonan ta sentral. Dor di fortalesé partisipashon, integridat i transparensia, nos ta konstruí un sosiedat mas fuerte i hustu den kua siudadanonan no ta solamente para na kantu mira, pero lo ta aktivo den duna forma na nan futuro i di pais.
Pa mas informashon i entrevista, kontakta Suzy Camelia-Römer na +5999.5106726