ÚLTIMO DESAROYONAN DEN FFK!
ÚLTIMO DESAROYONAN DEN FFK!
Elekshon pa direktiva nobo
E Komishon di Normalisashon a disidí den konsulta ku FIFA pa organisá elekshon di direktiva di FFK dia 10 di aprel próksimo. E konvokashon lo sali dia 24 di febrüari pa por kumpli ku e terminonan stipulá den e statutonan di FFK. Kandidatonan tin 10 dia pa nan por registrá i konfirmá ku nan tin interes pa asumí e diferente posishonnan ku tin habrí den direktiva di FFK. Den e konvokashon lo menshoná tur e kriterianan ku kandidatonan mester kumpli kuné pa bin na remarke pa postulá nan mes komo kandidato. Tur interesado ta bon biní pa entregá nan kandidatura konforme e reglanan stipulá den statutonan di FFK.
Relato finansiero 2023
E relato finansiero di aña 2023 ta praktikamente kla i lo ser presentá na miembronan dentro di termino kòrtiku pa aprobashon. Trabounan a kuminsá kaba pa prepará e relato finansiero 2024. Den luna di mart FIFA lo hasi e asina yamá Central Review pa revisá e uso di fondonan ku a ser risibí den 2024. Concacaf tambe a kuminsá pidi informashon pa por revisá uso di fondonan ku a ser risibí durante di 2024.
Kuentanan atrasá (kreditornan)
E komishon ta kanando e proseso di evaluashon di e fakturanan habrí huntu ku FIFA pa por determiná den kua forma lo por resolvé e problema aki strukturalmente.
Organisashon interno FFK
Un di e tareanan di e Komishon di Normalisashon ta pa sòru pa yega na un organisashon interno básiko i prosesonan operashonal pa garantisá ku e organisashon ta funshoná optimal. Dentro di poko la saka komunikadonan ku ta referí na proseduranan nobo pa fakturashon di 2024 i 2025.
Selekshon hubenil
Manera ta konosí dos selekshon hubenil (femenino i maskulino) a partisipá den eliminatorionan pa mundial U-17 den luna di yanüari ku febrüari 2025 na Nicaragua i Bermuda. E selekshonnan no a logra klasifiká pa e siguiente ronda di weganan di mundial U-17.
Selekshon maskulino Senior
E selekshon maskulino Senior tin ku kumpli ku un skema basta pisá durante di e promé parti di 2025. Tin un kombinashon di weganan pa klasifikashon pa Mundial 2026 i tambe tin e torneo di Concacaf Gold Cup 2025 den luna di yüni próksimo. Tur esaki lo tuma lugá bou di direkshon di Dick Advocaat i su staf tékniko. FFK ta den fase final pa sera konvenio ku Dick Advocaat pa e periodo di febrüari pa yüli 2025, ku opshon pa alargá esaki te ku novèmber 2025, depende di resultadonan di weganan den yüni 2025. Esaki ta resultado di spònsernan ku a mustra nan disponibilidat pa kontribuí i tambe FIFA ku a disidí pa sostené Kòrsou ku algun selekshon nashonal pa aña 2025. Aworaki a haña un mihó bista di e situashon finansiero di FFK komo resultado di e trabounan di e Komishon di Normalisashon; esei ta krea un konfiansa pa por sigui traha huntu.
Kampionato lokal
Ahinda tin deliberashon ku FIFA pa buta fondonan disponibel pa por organisá e kampionato lokal. Entre tantu e komishon ta hasiendo otro trámitenan pa por logra haña fondonan pa por hasi e preparashonnan nesesario p’asina e direktiva nobo lo por start e kampionatonan lokal.
