EMBAHADA DI REINO NA NEW YORK TA DESPEDI Y GRADICI PROME MINISTER PA SEMPER A REPRESENTANAN DIGNAMENTE
Prome Minister Evelyn Wever-Croes:
Cu un bunita encuentro sorpresa;
EMBAHADA DI REINO NA NEW YORK TA DESPEDI Y GRADICI PROME MINISTER PA SEMPER A REPRESENTANAN DIGNAMENTE
A referi na Prome Minister como e “shining star” cu a comberti den e “front lady” di Reino Hulandes
ORANJESTAD – Recientemente Prome Minister Evelyn Wever-Croes a biaha pa New York pa representa Reino un biaha mas na e conferencia di “Commission on the Status of Women” (CSW69) di Nacionnan Uni. Esaki tabata un conferencia di gran importancia pa Prome Minister ya cu como lider femenino y prome Prome Minister femenino di pais Aruba, e tema aki ta un prioridad. Esaki por a nota tambe den su 7 añanan den gobernacion na unda el a traha duro na conscientisa comunidad riba e tema di igualdad y derechonan di hende muhe.
Na final di su reunionnan na New York, Prome Minister a wordo sorprendi cu un bunita encuentro pa Embahada di Reino como despedida y gradicimento pa semper a representa Reino dignamente durante e ultimo 7 añanan na e reunionnan di Nacionnan Uni. Sigur un momento hopi emocional na unda cu por a nota nan aprecio pa e bunita trabou cu Prome Minister a bin ta eherciendo.
Emabahadora Lise Gregoire a duna un discurso chikito na unda el a expresa palabranan di inmenso gratitud na Prome Minister, y a referi na su persona como e “shining star” cu a comberti den e “front lady” di Reino Hulandes. Tambe el a indica cu nan ta sumamente orguyoso di por tabata tin e honor di traha di serca cu Prome Minister y di tabata tin’e como e representante di Reino durante e ultimo añanan.
Como gradicimento pa tur su esfuerso y gran trabou, e ekipo completo di Embahada di Reino a regala Prome Minister un vaas cu tulip blauw riba dj’e. E flor tulip ta bin di Hulanda y ta simbolisa trankilidad, serenidad y paz interno.
Prome Minister na su turno a expresa cu pa su persona semper e tabata un experiencia bunita y significativo di por a representa Reino tur e añanan aki. Tambe el a gradici e ekipo completo pa tur e sosten brinda na su persona, pa semper a kere den dj’e, y a deseanan tur clase di exito den e añanan venidero.
