MEO ta aploudí i kontribuí na e di sinku edishon di ‘Entrepreneur, Let’s Collaborate!’
Desaroyo Ekonómiko
MEO ta aploudí i kontribuí na e di sinku edishon di ‘Entrepreneur, Let’s Collaborate!’
Publiká riba 24 Mart 2025
WILLEMSTAD – Dia 28 di mart 2025, propietarionan di negoshi i empresarionan lo reuní na Landhuis Morgenster pa e di sinku edishon di “Entrepreneur, Let’s Collaborate.” Na e okashon aki e evento lo enfoká riba e arte esensial di kolaborashon i konstruí konfiansa den relashonnan di negoshi miéntras ta redusí gastunan di negoshi.
Oradornan prinsipal ta Giovanni Abath di 7.1 Experience, Clayten Mogen representando Komedor Krioyo i RustiQ, i Richailine Elisa di Elisa Academy. Kada un lo kompartí nan punto di bista riba kon nan a konstruí relashonnan di negoshi basá riba konfiansa ku a kontribuí direktamente na efisiensia, kalidat, kresementu i resiliensia den nan negoshi.
E programa Biz2Biz, di Ministerio di Desaroyo Ekonómiko, ta kai den e mesun liña ku e inisiativa di Entrepreneur, Let’s Collaborate. E ta enfoká entre otro riba redusí gastu dor di kolaborashon efektivo. Durante e evento aki Tamira La Cruz, programmanager di E6.3, lo kompartí algun best practices di den Karibe. E seshon lo pone énfasis spesial riba kon tur industria, inkluyendo e sektor kreativo manera pelíkula, medionan di komunikashon i arte, por benefisiá di práktikanan di krea konfiansa intenshonal i modelonan di negoshi kolaborativo. E aserkamentunan aki mas i mas ta wòrdu rekonosé komo esensial pa desaroyo empresarial sostenibel den ekonomia interkonektá di Kòrsou.
MEO ta aploudí i ta kontentu di por koperá ku inisiativanan partikular pa fomentá kolaborashon, kalidat i resiliensia, spesialmente esnan ku ta kontribuí na e áreanan di nos Strategia Nashonal di Eksportashon.
E evento “Entrepreneur, Let’s Collaborate.” lo tuma lugá na 7.1 Experience, na Landhuis Morgenster di 6:00 PM pa 9:30 PM riba djabièrnè 28 di mart 2025. Pa mas informashon, intresadonan por bishitá quality-xp.com/events.
Tokante E.6.3
E programa E.6.3 ta un inisiativa di landspakket ku ta enfoká riba redukshon di burokrasia i e kosto di hasi negoshi na Kòrsou pa medio di transformashon digital, mehorashon di proseso, “upskilling” i aserkamentunan kolaborativo.
