Ronda inisial Estudio di Kapasidat Turístiko di Kòrsou

Desaroyo Ekonómiko
Ronda inisial Estudio di Kapasidat Turístiko di Kòrsou
Publiká riba 25 Mart 2025
Willemstad – E siman aki consultantnan di Sustainable Travel International (STI) i George Washington University International Institute of Tourism Studies (GW IITS) ta di bishita na Kòrsou pa duna inisio na e estudio di Kapasidat di Destinashon Turístiko. Ehekushon di e estudio aki ta un paso krusial pa manehá i guia un kresementu di turismo mas sostenibel na Kòrsou. Ministerio di Desaroyo Ekonómiko (MEO) ta enkaminá e proseso akí huntu ku Ofisina di Turismo di Kòrsou (CTB).
Agènda di e Siman di Trabou
E siman di bishita ta konsistí di diferente reunionnan, seshonnan di interkambio ku stakeholders i bishitanan na diferente áreanan turístiko.
- 23 di mart: Bishita na áreanan turístiko riba e isla i interakshon ku komunidat lokal.
- 24 di mart: Seshon di trabou ku MEo i CTB pa aliniá ekspektativanan i áreanan di prioridat.
- 25 pa 27 di mart: Entrevistanan ku stakeholders i focus groups ku komunidat lokal.
- 28 di mart: Reunion di klousura ku Minister di Desaroyo Ekonómiko, MEO i CTB i bishitanan adishonal na atrakshonnan turístiko.
E estudio di Kapasidat di Destinashon Turístiko ta suprayá e kompromiso firme di Kòrsou pa promové un turismo di kalidat i balor agregá haltu i sostenibel, integrando perspektivanan di stakeholdernan lokal i internashonal. E bishita di e consultantnan lo produsí un modelo a base di datonan i análisis esensial ku ta yuda pa formulá strategianan riba termino mediano i largu.
MEO ta sumamente kontentu ku inisio di e estudio aki i ta konta ku koperashon di tur stakeholders den e sektor di turismo i komunidat di Kòrsou en general den realisashon di estudio aki ku lo kontribuí na konstrukshon di un industria di turismo sostenibel, kualitatitvo i próspero pa nos pais.