Miss Universe Netherlands Dutch Caribbean 2025 a konose su prome ganador
Miss Universe Netherlands Dutch Caribbean 2025 a konose su prome ganador
VEENENDAAL – Djadumingu dia 6 di Aprel ultimo den Theater Lampegiet na Veenendaal a tuma lugá e promé edishon di Miss Universe Netherlands Dutch Caribbean.
E sertamen aki ta un inisiativa nobo di Miss Universe Netherlands, I ta special pa damasnan di nos islanan den Reino ku ta biba na Hulanda. Ku e kompetensia aki, nan por representa Hulanda, pero tambe nan isla di orígen.
Un total di 8 kandidata a presenta den un forma magnifiko durante di e sertamen ku a laga e publiko ku a presenta na gran kantidat, satsfecho. Den un show magnífiko, ku tur elementu karibense, e 8 kandidatanan a briya durante e anochi.
E título maximo a bai pa Shashinduska Nazir , kende lo partisipá den e sertamen di Miss Universe Netherlands, ku lo tuma lugá dia 5 di yüli próksimo. E dama ku keda koroná e anochi ei na Miss Universe Netherlands, ku lo representa Hulanda den e kompetensia internashonal di Miss Universe 2025 na Thailandia.
Komo promé finalista a bai pa Nadien Philips, e di dos finalista pa Nadine van der Graaf, i e premio di tres finalista a bai pa Chanice Janssens.
Además, diferente sub-título a ser entregá durante e anochi:
– Best in Catwalk: Daniella Berry
– Miss Photogenic: Sharlena Clarinda
– Best in Interview: Shashinduska Nazir
Nadine van der Graaf a gana tambe 3 otro sub-títulonan di:
– Miss Media, Miss Congeniality i Miss Ela’s Choice (Ela’s Choice tabata e main sponsor di e trayekto).
Un palabra di pabien ta bai na tur e 8 kandidatanan, pero muy espesialmente na e finalistanan di e sertamen.
