Kòrsou ta selebrá Weganan di Rei 2025 ku un toke festivo!
Kòrsou ta selebrá Weganan di Rei 2025 ku un toke festivo!
Riba djamars 15 di aprel 2025, Kòrsou ta para ketu un biaha mas pa inougurá e di 13 edishon di Koningsspelen 2025. E aña aki, mas di 13 mil mucha na Kòrsou lo partisipa na e evento deportivo aki ku ta wòrdu selebrá den henter Reino Ulandes. Kada skol ta ser yama pa duna e dia un ‘twist’ èkstra spesial.
Gobernador di Kòrsou, Su Ekselensia Lucille-George Wout, lo duna e señal ofisial di apertura pa 08:30 na Skol pa Desaroyo Integral Tirzo Martha. Despues e fiesta ta kontinuá huntu ku tur e invitadonan, spònsernan i prensa, na Fatima College na Suffisant, ku ta selebrá e aña aki tambe su di 70 aniversario.
Kiko ta e meta di Koningsspelen?
Weganan di Rei a ser krea pa siña nos muchanan ku moveshon i nutrishon ta importante pa nan desaroyo. Promé ku muchanan kuminsá hasi deporte i move, ta esensial pa nan kuminsá e dia ku un bon desayuno. Un desayuno saludabel ta sigurá ku kada mucha tin sufisiente energia pa hasi ehersisio i por konsentrá mihó.
Despues di un bon desayuno, muchanan por partisipá yen di energia den tur aktividat deportivo di Weganan di Rei. Ehersisio no ta solamente dibertido, pero tambe importante pa un estilo di bida saludabel. Deporte i moveshon ta mehorá e kondishon físiko, ta fortalesé múskulonan i ta pone muchanan sinti nan mes felis i energétiko. Dor di kuminsá ku un desayuno nutritivo i despues hasi ehersisio, e muchanan ta siña kon pa kuida nan kurpa mas mihó.
E tema di e aña aki ta: Twist’
Tur aña Weganan di Rei tin un tema spesial, i e aña aki e tema ta ‘Twist’. Skolnan i muchanan ta wòrdu reta pa duna un twist èkstra na e Weganan di Rei. Por hasi un ahuste chikí òf un kambio grandi, serio òf djis unu loko òf inovativo, kualke kos ku ta pone muchanan move mas ainda ta bon biní. Skolnan ku ta partisipá ta liber pa disidí pa nan mes kon nan ta organisá e dia.
Deporte èkstra i weganan dibertido ku e kaha di deporte
Ehersisio i hunga pafó ta importante durante Weganan di Rei. Pa sostené skolnan den esaki, kada skol partisipante lo risibí un kaha spesial di deporte, meskos ku tur aña. E kaha aki ta yen di material ku ta motivá muchanan pa ta aktivo. Tur loke ta nesesario pa enkurashá deporte i weganan tantu durante komo despues di e Weganan di Rei.
Un danki spesial ta bai na tur nos Patrosinadónan; en partikular Reda Sosial, Ministerio di Enseñansa i Deporte, Corendon, Representashon di Hulanda, Stichting Signaal Sosial, Curinde i tur otro ku a hasi posibel pa organisá e fiesta aki pa tur mucha di skol básiko.
Bailando riba e kansion ofisial di Weganan di Rei no por falta!
Ku otro palabra: Baila bailalaa! Banda di deporte i weganan, músika naturalmente ta un parti esensial di e dia festivo aki. E aña aki e muchanan lo baila riba e kansion ofisial di Weganan di Rei: Baila Bailalaa di e organisashon ‘Kinderen voor kinderen na Ulanda’.
Tokante e Weganan di Rei
E Weganan di Rei a wòrdu organisá pa promé biaha na 2013 komo parti di e inougurashon di Rei Willem-Alexander, ku e meta pa stimulá nos muchanan den enseñansa primaria i nan mayornan, ku un bon desayuno i ta aktivo ta importante i hopi dibertido. Durante e di diestres edishon di e Weganan di Rei, mas ku un mion alumno di skol básiko di Hulanda i e parti Karibense di Reino lo move. E koordinashon nashonal di Weganan di Rei ta den man di Fundashon Fudsek i señora Mavis Albertina.
Sigui nos Weganan di Rei na Kòrsou!
Ku e twist inovativo, e Weganan di Rei 2025 lo ta un edishon úniko i festivo. Por haña portrèt i video di e aña aki i esnan anterior riba e paginá sosial di Facebook: http://www.facebook.com/Caribischkoningkrijk.
Huntu nos lo hasi e Weganan di Rei e aña aki atrobe, esun di mas dushi, deportivo i inolvidabel!
Saludo kordial,
Mavis Albertina
Voorzitter Koningsspelen Caribisch Nederland
Mobile: +599 9 527 7008| Email: mavis@nospais.cw
Web: https://www.facebook.com/CaribischKoninkrijk
