Di 9 sospechoso den kaso di asesinato di Peter R. de Vries, Raily Bart, ta yega Hulanda den avion privá di Hustisia Hulandes. 

Di 9 sospechoso den kaso di asesinato di Peter R. de Vries, Raily Bart, ta yega Hulanda den avion privá di Hustisia Hulandes.

Raily Bart ta sinta kastigu di 20 aña den prizòn aki na Kòrsou komo detenido den e kaso di dòbel asesinato na aeropuerto Hato kaminda dos primu Erwin Juliana i Shantle Arnhem a pèrdè nan bida i shete persona mas a resultá heridá. Raily Bart tabata shofúr di e vehikulo ku a keda usá den e kaso aki.

Raily Bart (39) lo mester ta un kabesante den un organisashon kriminal, NLS, ku entre otro ta metí den kaso di asesinato di Peter R. de Vries.

Asesinato di Peter R. de Vries ku a tuma lugá na yuli di aña 2021 a keda kordiná for di prizòn na Kòrsou. Raily Bart tabata den kontakto ku Divainy K. di Kòrsou, ku tabata na Hulanda. Divainy K. mester a tuma kontakto ku yunan di Kòrsou Ludgardo S., Gerower M. i Erickson O. Detenido ku a tira Peter R. de Vries ta Arubano Delano G. Ademas tin tres detenido ku tabata envolví den e kaso aki ku ta di desendensia Polako.

Organisashon kriminal No Limit Soldiers, NLS, a originá na Kòrsou i ta aktivo na Sint Maarten tambe. Den kaso di e dòbel asesinato na aeropuerto Hato, e dos personanan ku a tira tambe ta miembro di e organisashon No Limit Soldiers. Den kaso di asesinato di polítiko Helmin Wiels na aña 2013 tambe NLS tabata envolví.