UPDATE: DESGRASIA DEN KUAL DAMA HULANDES A PERDE SU BIDA TA SIMPLEMENTE UN AKSIDENTE O ALGU OTRO?

DESGRASIA DEN KUAL DAMA HULANDES A PERDE SU BIDA TA SIMPLEMENTE UN AKSIDENTE O ALGU OTRO?
A konsekuensia di e aksidente ku morto ku a tuma lugá den oranan di djamars anochi na altura di Daniel, tin varios pregunta ta bin dilanti riba kual outoridat no tin kontesta. E dama Hulandes ku a pèrdè su bida den e aksidente aki ta un dama ku tabata pasahero den e vehikulo en kuestion. E dama no tabata tin niun klase di identifikashon i di tal forma no por keda identifiká ofisialmente. Shofur di e vehikulo ta bai keda interogá djarason na CMC.
Un punto di atenshon ta e hecho ku tabata tin un beibi, yu di e dama, tambe den e vehikulo na momentu di e aksidente. E tabata patras den e vehikulo den su maxicosi. Sinembargo djis despues ku e aksidente a tuma lugá, un persona, a akudí na e sitio i a saka e beibi for di e vehikulo i a bai ku n’e Tera Kòrá. Despues di varios ora un persona a regresá ku e beibi na e sitio i a identifiká su mes komo famia di e shofur.
Aparentemente e dama ku a pèrdè su bida tabata na estado algun dia pasá ku el a yega Kòrsou ku vakashon.
Alabes algun dia pasá tambe tabata tin mester di asistensia polisial na bibienda di e shofur.
Pues, tin varios punto ku mester risibí aklarashon.
A base di e puntonan ariba menshoná i opservashonnan hasí pa outoridatnan polisial, e investigashon den e kaso aki a keda ampliá i intensifiká. Komo tal e sitio di e aksidente a keda deklará komo PD (Plaats Delict).
Kurpa di e viktima a keda konfiská pa por ehekutá outopsia di lei. E vehikulo tambe a keda konfiská, meskos e telefonnan selular di e shofur i e dama ku a fayesé.
Investigashon ta kontinuá.
Pas na alma di e defuntu.
639114718427035"
639114718427035"