ENTREGA DI SERTIFIKADO DI E PROMÉ TRAYEKTO DI PROGRAMA BIBA AMISTAT

ENTREGA DI SERTIFIKADO DI E PROMÉ TRAYEKTO DI PROGRAMA BIBA AMISTAT

Willemstad – Minister Presidènt, sr. Gilmar Pisas i Minister di Enseñansa, Siensia, Kultura i Deporte, sr. Sithree van Heydoorn, djaweps 22 di mei 2025 a hasi entrega di sertifikado pa e programa di Biba Amistat na e promé kursistanan di e trayekto #1.

Biba Amistat ta un método di lès ku ta desaroyá pa e segundo siklo di Enseñansa di Fundeshi. E ta pa muchanan di grupo 6, 7 i 8 ku ta enfoká riba nan desaroyo personal i resistensia. Ta un método interaktivo kaminda temanan manera e.o. pubertat, emoshon, konfiansa, amistat, famia, auto-estima, relashon, influensha di medionan sosial, siña konosé e kurpa i seksualidat ta keda tratá. Banda di esaki e ta stimulá tambe diálogo entre e alumnonan mes, ku nan dosente i ku nan mayornan, ku speransa ku tur grandi i chikí por komprondé otro mihó i asina por aktua di manera mas konsiente i responsabel.

Biba Amistat huntu ku Biba Amor ta programanan ku ta diseñá pa fortalesé desaroyo di nos mucha- i nos hóbennan. Biba Amor kual ya a kumpli su di tres lustro i awor ta keda duná tambe na Aruba i Boneiru, ta un programa di orientashon pa skol sekundario. Biba Amistat a keda desaroyá despues, pero ta un tipo di ‘preparashon’ di e muchanan pa e programa di Biba Amor na skolnan sekundario.

E programanan aki a keda introdusí komo responsabilidat di gobièrnu pa ku pueblo di Kòrsou den sentido general, pa e demanda pa informashon tokante desaroyo personal di un mucha promé ku nan yega na skol sekundario, pero tambe pa motibu di e nesesidat pa tin maestronan entrená ku por transmití e informashon di forma korekto i responsabel na mucha- i hòbennan. E lèsnan por ser duná di manera independiente komo tema apart, pero nan ta kombiná bon den e kuríkulo di Enseñansa di Fundeshi i esun di skol sekundario.

E programa tin dos obhetivo prinsipal. Primeramente pa prepará maestronan di grupo 6, 7 i 8 ku ta tuma parti den e trayekto. Asina nan ta haña konosementu, abilidatnan i e kompetensianan nesesario pa nan por duna lès tokante desaroyo personal i resistensia den nan skol. Na di dos lugá, pa duna e alumnonan di grupo 6, 7 i 8 e konosementu i formashon nesesario pa nan por trata ku nan mes, na kas i ku otro hende. E mayornan di e mucha tambe ta haña e informashon nesesario pa nan por guia i apoyá e muchanan.

Den e promé trayekto a partisipá kursistanan di A.E. Goilo School, Skol Toirso Martha, Römer School i repesentantenan di trahadónan sosial di DOS, RK-Schoolbestuur i VPCO.

NÒMBER DI E KURSISTANAN DI TRAJEKTO # 1

A.E.Goilo School

1. Miriëlva Martina- Gerard
2. Dyanara Maria
3. Solangecelly Justin
4. Gentiana Hooi
5. Gwendolyn Eisden
6. Gilsmary Maria
7. Rachel Bryson

Skol Tirso Martha

1. Dinaida de Kaster
2. Miraica Manuela
3. Sandra van Gobbel
4. Judella de Windt
5. Maryloushka Ramos

Römer school

1. Alwina Efrosina
2. Solange Monk- Marques Ferreira
3. Sammantha Offerman
4. Thirza Buil
5. Yurika Hollander
6. Druchella den Dulk

 

TRAHADÓNAN SOCIAL DI:

 

DOS

1. Fionarda de Windt
2. Kimberly Specht
3. Maleachi Ostiana
4. Shaina Privani

 

RK-Schoolbestuur

1. Lidoushka Juliao
2. Taizy Sluis
3. Galya Stroop
4. Giselle Martha – Jonge

VPCO

1. Evita held
   

###