Seremonia di entrega sertifikado supervisor Kódigo di Protekshon

Djárason 28 di mei 2025, den kompania di minister Dayanara Chin-A-Lien – Roozendal, ministerio di Desaroyo Sosial, Labor i Bienestar (SOAW) pa medio di sektor Famia i Hubentut, a tene un seremonia, kaminda 22 profeshonal a risibí nan sertifikado ‘Supervisor Kódigo di Protekshon’.

Salí for di e ‘Plan Nashonal di Kòrsou pa kombatí maltrato di mucha i violensia relashonal’ tin e rekomendashon, ku mester tin un punto sentral kaminda tur kaso di maltrato di mucha i violensia relashonal ta keda registrá. Mará na e rekomendashon aki, ministerio di SOAW a introdusí e Kódigo di Protekshon. E kódigo ta 5 stap ku kada profeshonal na un manera uniformá ta aktivá i sigui, na momentu ku tin sospecho di maltrato di mucha i/ òf violensia relashonal.

E supervisor Kódigo di Protekshon ta e profeshonal den e ministerio/ organisashon ku tin e bon konosementu di e 5 stapnan i ta e persona asigná kaminda kada kolega por yega pa haña konseho i guia. Tambe e ta duna e team di maneho konseho, kon pa sigui evitá i trata víktimanan rondó di maltrato di mucha i/ òf violensia relashonal profeshonalmente.

Henter e programa aki ta ser kargá dor di kuater ministerio: Ministerio di Hustisia, Ministerio di Salubridat, Ministerio di Medio ambiente i Naturalesa, Ministerio di Enseñansa, Siensia i Kultura i Ministerio di Desaroyo Sosial, Labor i Bienestar kaminda e último, tin e responsabilidat pa manehá e programa.

Salí for di kada ministerio diferente organisashonnan a keda invitá pa tuma parti na e training Kódigo di Protekshon. E intenshon ta pa yega na mas ku 100 supervisor rònt Kórsou, di manera ku kada organisashon tin su propio supervisor di Kódigo den kas. Mirando ku e último training aki tabata e di tres grupo, ya a yega 71 supervisor sertifiká. Pa e aña aki nos lo tin mas training, surpasando asina e kantidat di 100 supervisor di Kódigo.

Aña pasá durante un periodo di ocho siman, diferente profeshonalnan a haña training parando ketu na diferente tema i aspektonan mará na maltrato di mucha i violensia relashonal.

Algun di e temanan tratá tabata: e ròl i tarea di un supervisor di kódigo, e 5 stapnan di e kódigo, kiko ta maltrato di mucha i violensia relashonal, faktornan di rísiko, agreshon di generashon, dokumentá i raportá basá riba echo(nan), aspektonan hurídiko i tareanan di ProtehaMi.

ProtehaMi ta e instituto gubernamental kaminda e kasonan di maltrato di mucha i violensia relashonal lo mester keda registrá. Pronto henter e programa lo keda ankrá den lei kaminda kada profeshonal trahando ku mucha i/ òf adulto lo mester aktivá e kódigo na momentu ku tin sospecho di maltrato o violensia relashonal.

Pa por finalisá e training, na final kada profeshonal mester a entregá un plan di akshon i tambe un protokòl kon e Kódigo di Protekshon lo keda apliká den su organisashon poniendo énfasis ken tur ta e personanan klave i responsabel den e proseso aki.

E trabounan lo sigui tuma lugá via di e sentro di konosementu i ekspertisio ku ta den proseso di ser fundá, lo sigui fasilitá kada profesional i supervisor ku informashon i guia riba e tereno di maltrato di mucha i violensia relashonal. Den futoro lo tende mas di e sentro aki.

Ku bista riba e tareanan di e sentro aki, ministerio SOAW ta mira, ku si tur ministerio i organisashon sigui yuda karga, huntu nos lo sigui yuda aportá na bienestar di kada persona i famia sin hasi distinshon, salbando bida di e víktimanan i sòru pa un desaroyo positivo i ‘safe’ di nos muchanan. E hende ta keda sentral i importante!